Fenomeni “El Niño” pritet të arrijë kulmin në fund të vjeshtës ose në fillim të dimrit, ndërsa sipas parashikimeve të NOAA ka rreth 70% mundësi që të shndërrohet në një nga episodet më të fuqishme të regjistruara që nga viti 1950. Sipas agjencisë amerikane, kushtet e “El Niño”-s po përforcohen me shpejtësi dhe episodi i ardhshëm mund të jetë edhe më i fuqishëm se “Super El Niño” i viteve 1982-1983.
Shkencëtarët paralajmërojnë se përplasja e këtij fenomeni me efektet e ngrohjes globale mund të sjellë temperatura edhe më të larta, duke përkeqësuar valët e të nxehtit dhe duke rritur intensitetin e disa fenomeneve ekstreme të motit. Për shkak të fuqisë së pritshme të “El Niño”-s, viti 2027 shihet si një kandidat i fortë për të thyer rekordin si viti më i nxehtë i regjistruar, ndërsa edhe 2026 mund të regjistrojë temperatura rekord.
“El Niño” lidhet me ngrohjen e pazakontë të ujërave të Oqeanit Paqësor dhe ndikon në temperaturat dhe modelet e motit në shumë pjesë të botës. Faza e kundërt, “La Niña”, shoqërohet me ftohjen e këtyre ujërave dhe me ndryshime të tjera në modelet atmosferike, ndërsa periudhat mes dy fenomeneve konsiderohen faza neutrale të ciklit klimatik ENSO.