Një operacion masiv kërkimi është vënë në lëvizje në të gjithë Berlinin pas sulmit të rëndë që tronditi aktivitetin e Krenarisë LGBTQ+ në qendër të kryeqytetit gjerman. Bilanci paraprak flet për një person të vdekur dhe 16 të plagosur, disa prej tyre në gjendje të rëndë.
Sipas autoriteteve gjermane, i dyshuari kryesor është Abdul B., i cili dyshohet se rreth orës 22:00 të së shtunës drejtoi një automjet drejt turmës së mbledhur pranë parkut Tiergarten. Hetuesit po verifikojnë gjithashtu mundësinë që pas përplasjes një ose më shumë persona të jenë larguar nga automjeti.
Sipas rindërtimit të ngjarjes, një makinë e bardhë hyri me shpejtësi në zonën ku zhvillohej aktiviteti dhe përplasi pjesëmarrësit. Pas goditjes, automjeti doli nga kontrolli, u përplas me një pemë dhe u gjet i braktisur brenda parkut.
Menjëherë pas incidentit, policia izoloi vendngjarjen dhe nisi një operacion të gjerë për kapjen e autorit ose autorëve. Aktiviteti i Krenarisë u anulua, ndërsa pjesëmarrësit u evakuuan përmes Portës së Brandenburgut. Njësitë e policisë zhvilluan kontrolle intensive në zonë, duke përdorur edhe mjete ajrore dhe kamera termike.
Shërbimi zjarrfikës i Berlinit bëri të ditur se gjatë natës rreth 30 persona morën ndihmë mjekësore në vendngjarje pasi pësuan gjendje shoku nga ajo që ndodhi.
Në orët e para të hetimeve, policia njoftoi se kishte identifikuar një të dyshuar të njohur për autoritetet, i cili sipas tyre kishte lidhje me atë që përshkruhet si "skena islamike" në Berlin. Zëdhënësi i policisë, Florian Nath, deklaroi se operacioni për kapjen e tij vijon me intensitet të lartë dhe se kërkimet janë shtrirë tashmë në të gjithë qytetin.