Të paktën pesë persona kanë humbur jetën dhe 20 të tjerë janë plagosur si pasojë e një sulmi të ri rus në Zaporizhia, në juglindje të Ukrainës. Sulmi ndodhi gjatë natës, ndërsa autoritetet ukrainase paralajmëruan se bilanci i viktimave mund të rritet, pasi ekipet e emergjencës vijojnë punën në zonat e goditura.
Lajmi për pesë viktimat u bë i ditur në orët e para të mëngjesit nga komandanti i distriktit ushtarak të Zaporizhias, Ivan Fedorov.
“Pesë persona u vranë, 20 të tjerë u plagosën. Fatkeqësisht, numri i viktimave të sulmit armik në Zaporizhia është në rritje”, deklaroi Fedorov përmes një postimi në Telegram.
Autoritetet ukrainase raportuan për dëme në qytet, ndërsa shërbimet e emergjencës u angazhuan në pasojat e sulmit.
Sulm me raketa balistike edhe në Kiev
Në të njëjtën kohë, forcat ruse shënjestruan edhe Kievin.
Autoritetet e kryeqytetit ukrainas raportuan se qyteti u vu nën sulm me raketa balistike ruse, ndërsa banorët dëgjuan shpërthime të fuqishme gjatë natës.
Alarmet ajrore u aktivizuan në Kiev dhe në zona të tjera të Ukrainës, ndërsa autoritetet u bënë thirrje banorëve të qëndronin në strehimore.
Sulmet në Zaporizhia dhe Kiev përbëjnë një tjetër episod të fushatës së sulmeve ajrore dhe raketore të Rusisë ndaj qyteteve ukrainase.
Ndërsa lufta vijon, sulmet gjatë natës kanë shkaktuar viktima dhe dëme të konsiderueshme në zona të banuara dhe infrastruktura civile, ndërsa ekipet ukrainase vijojnë vlerësimin e pasojave të bombardimeve. Top Channel