Dita e 19-të e protestës së studentëve ka vënë në lëvizje një numër të madh forcash policore në Tiranë. Mbi 2 mijë efektivë të Policisë së Shtetit janë angazhuar për protestën e sotme, ndërsa kryeqyteti është blinduar me forca të shumta sigurie.
Në mbështetje të studentëve ka dalë sot edhe Partia Demokratike, e cila zhvillon tubimin e saj të dytë kombëtar që prej nisjes së revoltës studentore.
Forcat e policisë janë pozicionuar kryesisht në pjesën e pasme të godinës, ndërsa në gatishmëri janë vendosur edhe autobotët me ujë me presion dhe efektivët e Forcave të Ndërhyrjes së Shpejtë, të pajisur me mjete speciale.
Në operacion janë përfshirë forcat “Shqiponja”, FNSH-ja, efektivë të komisariateve të Tiranës dhe agjentë civilë. Situata do të monitorohet gjithashtu nga ajri përmes dronëve.
Protestuesit do të jenë nën vëzhgim edhe përmes kamerave të sigurisë me rezolucion të lartë, ndërsa autoritetet synojnë identifikimin dhe dokumentimin e çdo shkeljeje të mundshme.
Protesta zhvillohet gjithashtu nën hijen e aktit të ri normativ për protestat, i cili i jep kompetenca shtesë Policisë së Shtetit dhe parashikon gjoba nga 10 mijë deri në 500 mijë lekë për shkelje të ndryshme, përfshirë mosbindjen ndaj urdhrit për shpërndarjen e tubimit dhe mbulimin e fytyrës.
Ndërsa studentët hyjnë në ditën e 19-të të revoltës së tyre, përgjigjja e pushtetit duket të jetë një prani masive policore, autobotë me ujë dhe monitorim me kamera e dronë.