Skandali i ndërtimit të Kishës së Shën Pagëzorit në Vermosh, në Bashkinë e Malësisë së Madhe, rikthen në vëmendje akuzat për përfshirje të politikës në interesa elektorale. Sipas kallëzimit të depozituar në SPAK nga organizata “Diaspora për Shqipërinë e Lirë”, kryebashkiaku Tonin Marinaj dyshohet se u ka kërkuar përfaqësuesve të diasporës shqiptare në SHBA mbështetje me vota për Partinë Socialiste në zgjedhjet parlamentare të vitit 2025, në këmbim të lejimit të ndërtimit të kishës pa leje dhe pa paguar taksat përkatëse. Marinaj i ka mohuar këto pretendime, duke deklaruar para hetuesve se nuk kishte pasur dijeni për ndërtimin e objektit fetar.
Sipas kallëzimit, emigrantët shqiptarë në Nju Jork dhe Michigan kishin mbledhur qindra mijëra dollarë për rindërtimin e kishës, ndërsa organizata “Diaspora për Shqipërinë e Lirë” kishte siguruar mbi 500 mijë dollarë donacione. Sipas Bold News, projekti, i nisur në vitin 2023, parashikonte një investim që fillimisht ishte vlerësuar rreth 400 mijë dollarë, por më pas shifra kishte arritur në 1.7 deri në 2 milionë dollarë. Donatorët pretenduan se Marinaj u kishte sugjeruar të mos aplikonin për leje ndërtimi, pasi taksat mund të arrinin deri në 30% të vlerës së projektit, duke kërkuar në këmbim mbështetje elektorale. SPAK nuk arriti të siguronte prova për përfshirjen e kryebashkiakut në krim zgjedhor, ndërsa hetimet për ndërtimin e paligjshëm kaluan në Prokurorinë e Shkodrës.
Për këtë çështje u morën të pandehur sipërmarrësi Gjergj Vuktikaj, kryeinspektori Përparim Hysaj dhe katër inspektorë të Inspektoratit Ndërtimor Vendor. Në mars 2026, Gjykata e Shkodrës i dënoi me nga 12 deri në 16 muaj burgim, por vuajtja e dënimit u pezullua. Të akuzuarit e ankimuan vendimin, ndërsa në mesin e tetorit 2026, Gjykata e Apelit vendosi kthimin e dosjes për rigjykim në shkallën e parë, për shkak të mangësive procedurale në vendimin fillestar. Apeli theksoi se pretendimet për pafajësi nuk qëndronin, por çështja kërkonte një shqyrtim të ri gjyqësor.