Një studim i ri nga studiues të Caltech sugjeron se e ardhmja e Sistemit Diellor mund të jetë më kaotike nga sa mendohej. Sipas modelimeve të reja, Jupiteri, Saturni, Urani dhe Neptuni mund të humbasin stabilitetin orbital rreth 1 miliard vjet pasi Dielli të përfjë jetën e tij si yll. Vlerësimet e mëparshme sugjeronin se orbitat e planetëve gjigantë mund të qëndronin të qëndrueshme për rreth një kuintilion vjet.
Dielli është rreth 4.57 miliardë vjeç dhe pritet të jetojë edhe rreth 5 miliardë vjet, përpara se të zgjerohet në një gjigant të kuq. Gjatë kësaj faze, Merkuri, Venera dhe Toka pritet të përfshihen nga zgjerimi diellor, ndërsa Marsi mund të mbijetojë. Më pas, Dielli do të humbasë pjesën më të madhe të masës dhe do të shndërrohet në një xhuxh të bardhë, duke bërë që orbitat e planetëve të jashtëm të zgjerohen.
Studiuesit përdorën superkompjuterë dhe qindra simulime numerike, duke përfshirë në modele humbjen e masës së Diellit në mënyrë të rastësishme dhe episodike. Sipas rezultateve, këto ndryshime të papritura mund të prishin ekuilibrin gravitacional mes katër planetëve gjigantë dhe ta bëjnë sistemin të paqëndrueshëm shumë më herët se parashikimet e mëparshme. Studimi, me titull “Terminal Instability of the Solar System Triggered by Stochastic Solar Mass Loss”, është publikuar në “The Astrophysical Journal Letters”.