Pamjet e një kamere sigurie kanë fiksuar lëvizjet e një personi të maskuar, i cili, duke udhëtuar me motor, dyshohet se vendosi një sasi lënde plasëse në automjetin e Beqir Devollit. Sipas burimeve, makina ishte parkuar pranë lokalit të një personi të njohur të viktimës, me dyert e hapura. Në pamjet e sigurisë, personi i maskuar shihet duke vendosur pajisjen shpërthyese në zonën e sediljes së shoferit, për t’u larguar më pas nga vendi i ngjarjes.
Shpërthimi ndodhi një ditë më vonë, pranë Drejtorisë së Policisë së Gjirokastrës, pasi lënda plasëse dyshohet se u aktivizua nga distanca. Sipas të dhënave paraprake, viktima mund të jetë ndjekur për të paktën tre kilometra përpara se makina të shpërthente.
Ngjarja i mori jetën Beqir Devollit, i njohur edhe si “Çilo Hunderri”, ndërsa miku i tij, Erigels Mela, mbeti i plagosur.
Hetuesit po analizojnë pamjet e kamerave të sigurisë me qëllim identifikimin dhe gjurmimin e personave të dyshuar për përfshirjen në atentat. Ndërkohë, një nga pistat kryesore ku janë përqendruar hetimet mbetet ajo e hakmarrjes.