Foto ilustruese Buxheti 2027 ndan miliarda lekë për Mbrojtjen, Policinë, SPAK-un, drejtësinë dhe institucionet e tjera. Pas shqyrtimit në komisione, disa kërkesa për fonde shtesë janë mbështetur, ndërsa të tjera janë refuzuar ose mbeten për shqyrtim. Projektbuxheti i vitit 2027, i miratuar në parim në Kuvend me 80 vota pro, ka kaluar fazën e shqyrtimit nen për nen në komisionet parlamentare. Gjatë këtij procesi, institucionet kanë paraqitur kërkesat për financime shtesë, për shtim të numrit të punonjësve, për shpenzime operative dhe për investime. Një pjesë e kërkesave janë mbështetur nga komisionet, ndërsa të tjera janë rrëzuar ose janë lënë për t'u shqyrtuar gjatë vitit buxhetor.
Në raportin e Komisionit për Nismat Qytetare, Bashkëpunimin dhe Mbikëqyrjen Institucionale, fondet e parashikuara për institucionet e pavarura që raportojnë drejtpërdrejt në Kuvend dhe nuk kanë pavarësi financiare arrijnë në 19,45 miliardë lekë. Kjo shumë është 426,2 milionë lekë, ose 2,24%, më e lartë se buxheti i ndryshuar i vitit 2026.
I njëjti komision ka propozuar financime shtesë prej 755,42 milionë lekësh, të ndara në 114,92 milionë lekë për personelin, 273 milionë lekë për shpenzime operative dhe 367,5 milionë lekë për investime kapitale. Në raport propozohet edhe zgjerimi i organikave të disa institucioneve.
Një nga propozimet më të mëdha i përket Këshillit të Lartë Gjyqësor. Për KLGJ-në dhe sistemin gjyqësor, projektbuxheti parashikon 6,77 miliardë lekë, nga të cilat 4,75 miliardë lekë për paga dhe sigurime shoqërore, 1,03 miliardë lekë për mallra dhe shërbime dhe 972,5 milionë lekë për investime.
KLGJ kërkoi shtimin e 199 punonjësve në administratën gjyqësore, financimin e 90 punonjësve me kontratë dhe tre pozicione të tjera në administratën e vet. Institucioni kërkoi gjithashtu 109,45 milionë lekë për shpenzime operative dhe investime në vlerën 2,97 miliardë lekë.
Pas shqyrtimit, Komisioni i Ligjeve propozoi 459 milionë lekë shtesë për sistemin gjyqësor. Nga kjo shumë, 80 milionë lekë janë për 95 punonjës të rinj, përkatësisht 45 punonjës sigurie dhe 50 ndihmës ose sekretarë ligjorë. Një fond prej 109 milionë lekësh është propozuar për financimin e 90 punonjësve me kontratë, 100 milionë lekë për shërbimin e sigurisë, tarifat postare dhe qiratë, ndërsa 170 milionë lekë për pajisje sigurie në gjykata.
Për Ministrinë e Drejtësisë, projektbuxheti parashikon 15,68 miliardë lekë, rreth 717,26 milionë lekë më shumë se buxheti i ndryshuar i vitit 2026. Nga fondi i vitit 2027, 8,66 miliardë lekë janë për paga dhe sigurime shoqërore, 3,13 miliardë lekë për mallra dhe shërbime, 2,67 miliardë lekë për transferta dhe 1,23 miliardë lekë për investime.
Ministri i Drejtësisë, Toni Gogu, kërkoi 1,99 miliardë lekë shtesë, nga të cilat 822,11 milionë lekë për shpenzime korrente dhe 1,17 miliardë lekë për investime. Komisioni nuk i mbështeti këto kërkesa. Për nevojat e personelit dhe fondet e burgut të Shënkollit, ai rekomandoi shqyrtimin e mundësisë së transferimit të personelit dhe financimit përkatës pranë Ministrisë së Shëndetësisë dhe Mbrojtjes Sociale.
Për Strukturën e Posaçme Kundër Korrupsionit dhe Krimit të Organizuar, projektbuxheti është rreth 2,32 miliardë lekë, pothuajse i pandryshuar nga viti 2026. Fondi përfshin 1,42 miliardë lekë për paga, 165,5 milionë lekë për sigurime shoqërore, 366,1 milionë lekë për mallra dhe shërbime dhe 369 milionë lekë për investime.
Për SPAK-un dhe Byronë Kombëtare të Hetimit janë parashikuar 364 punonjës, 25 më shumë se organika e vitit 2026. Gjatë seancës dëgjimore, përfaqësuesit e SPAK-ut konfirmuan se nuk kishin kërkesa për fonde shtesë përtej projektbuxhetit.
Prokuroria e Përgjithshme ka një buxhet të parashikuar prej 3,49 miliardë lekësh, me rritje prej 97,12 milionë lekësh kundrejt vitit 2026. Nga kjo shumë, rreth 2,95 miliardë lekë janë për paga dhe sigurime shoqërore, 408,25 milionë lekë për mallra dhe shërbime dhe 130 milionë lekë për investime. Institucioni kërkoi vetëm dy punonjës shtesë të teknologjisë së informacionit, për ngritjen e Sistemit të Integruar të Menaxhimit të Çështjeve. Komisioni e mbështeti kërkesën.
Komisioni i Prokurimit Publik ka një buxhet fillestar prej 128,42 milionë lekësh. Institucioni kërkoi 61,1 milionë lekë shtesë dhe 10 pozicione të reja pune. Nga kërkesa, komisionet mbështetën 40 milionë lekë: 10 milionë lekë për pesë inspektorë të rinj dhe 30 milionë lekë për qiranë e ambienteve të punës. Për pesë pozicionet e tjera u parashikua mundësia e angazhimit me kontrata të përkohshme, sipas procedurave përkatëse.
Për Komisionin Qendror të Zgjedhjeve, projektbuxheti parashikon 454,25 milionë lekë. KQZ kërkoi 265,47 milionë lekë shtesë, nga të cilat 51,7 milionë lekë për mirëmbajtjen e sistemeve informatike dhe licencat, 33,77 milionë lekë për qiranë e magazinave në Vaqarr dhe 180 milionë lekë për zgjerimin e kapaciteteve magazinuese. Komisioni propozoi miratimin e 34 milionë lekëve për qiranë e magazinave.
Zyra e Inspektorit të Lartë të Drejtësisë ka një buxhet të parashikuar prej 352,66 milionë lekësh, 93,54 milionë lekë më pak se në vitin 2026. Institucioni kërkoi 131,675 milionë lekë shtesë, ku pjesën kryesore e zinte financimi i Sistemit të Menaxhimit të Çështjeve dhe Dokumenteve. Komisioni mbështeti 125,5 milionë lekë për këtë sistem.
Gjykata Kushtetuese ka një projektbuxhet prej 304,58 milionë lekësh, 4,72 milionë lekë më pak se buxheti i ndryshuar i vitit 2026. Institucioni kërkoi 30,655 milionë lekë shtesë, kryesisht për paga. Raporti i Komisionit të Ligjeve nuk përcakton miratimin e kësaj shume, por përmban një propozim për likuidimin brenda dhjetorit 2026 të shpenzimeve të personelit të Kolegjit të Posaçëm të Apelimit.
Për Autoritetin e Dosjeve, fondi i parashikuar është 188,79 milionë lekë. Autoriteti kërkoi 44,5 milionë lekë shtesë për digjitalizimin, sigurinë e arkivit, mbrojtjen e informacionit, edukimin qytetar dhe pajisjet informatike. Komisioni i Ligjeve nuk i mbështeti kërkesat.
Komisioneri për Mbikëqyrjen e Shërbimit Civil ka një buxhet të parashikuar prej 133,97 milionë lekësh. Institucioni kërkoi 3,877 milionë lekë për shpenzime korrente, 30,67 milionë lekë për investime dhe tre punonjës shtesë për digjitalizimin. Komisioni nuk propozoi financim shtesë, por rekomandoi që projekti i sistemit të kompjuterizuar të shqyrtohej gjatë vitit 2027, pasi të përcaktohej kostoja e plotë.
Për Ministrinë e Administratës Publike, një institucion i ri, projektbuxheti parashikon 594,13 milionë lekë dhe 193 punonjës. Ministrja Adea Pirdeni kërkoi 27 pozicione të tjera pune, ndërsa Komisioni i Ligjeve propozoi miratimin e 15 prej tyre.
Këshilli i Lartë i Prokurorisë ka një buxhet të parashikuar prej 235,14 milionë lekësh, me rritje prej 4,64 milionë lekësh ndaj vitit 2026. Për Presidencën janë parashikuar 464,57 milionë lekë, 130,51 milionë lekë më pak se një vit më parë. Presidenca nuk paraqiti kërkesa për fonde shtesë.
Në raportin e Komisionit për Nismat Qytetare, Bashkëpunimin dhe Mbikëqyrjen Institucionale përfshihet edhe Autoriteti i Konkurrencës, me një projektbuxhet prej 125,9 milionë lekësh. Institucioni kërkoi 46,54 milionë lekë shtesë, përfshirë financimin e pesë pozicioneve të reja. Komisioni propozoi 10 milionë lekë shtesë për personelin dhe miratimin e pesë pozicioneve.
Ndërkohë, Komisioni për të Drejtat e Njeriut dhe Mjetet e Informimit Publik ka shqyrtuar kërkesat e Avokatit të Popullit, Komisionerit për të Drejtën e Informimit dhe Mbrojtjen e të Dhënave Personale, Komisionerit për Mbrojtjen nga Diskriminimi dhe Radiotelevizionit Shqiptar.
Për Avokatin e Popullit, projektbuxheti parashikon 210,58 milionë lekë. Gjatë seancës dëgjimore, drejtuesi i institucionit, Endrit Shabani, kërkoi shtimin e 20 pozicioneve të reja dhe angazhimin e dy specialistëve me kontrata të përkohshme. Efekti financiar i kësaj kërkese është 38,62 milionë lekë. Komisioni për të Drejtat e Njeriut e mbështeti kërkesën dhe e përcolli për shqyrtim në komisionin përgjegjës. Në raportin e Komisionit për Nismat Qytetare, kërkesat totale të institucionit paraqiten në 58,117 milionë lekë, duke përfshirë edhe shpenzime të tjera për sisteme informatike, automjet dhe detyrime.
Për Komisionerin për të Drejtën e Informimit dhe Mbrojtjen e të Dhënave Personale janë parashikuar 236,72 milionë lekë, rreth 43 milionë lekë më shumë se në vitin 2026. Organika e institucionit është planifikuar me 77 punonjës, shtatë më shumë se një vit më parë.
Komisioni për të Drejtat e Njeriut ka mbështetur edhe kërkesat për shtesa buxhetore të Komisionerit për Mbrojtjen nga Diskriminimi, duke i përcjellë për shqyrtim në komisionin përgjegjës.
Për Radiotelevizionin Shqiptar, projektbuxheti parashikon 940 milionë lekë financim nga buxheti i shtetit për veprimtari të caktuara të transmetuesit publik. Nga kjo shumë, 319 milionë lekë janë për shërbimet për shqiptarët jashtë kufirit, 300 milionë lekë për projektet teknike dhe teknologjitë e reja, 126 milionë lekë për prodhime filmike dhe veprimtari artistike mbarëkombëtare dhe 195 milionë lekë për Orkestrën Simfonike dhe Kinematografinë.
Financimi i parashikuar për RTSH-në është 50 milionë lekë më i lartë se në vitin 2026. Drejtorja e Përgjithshme, Eni Vasili, kërkoi edhe 750 milionë lekë shtesë, prej të cilave 239 milionë lekë për shpenzime korrente dhe 511 milionë lekë për investime teknologjike. Kërkesat përfshijnë mirëmbajtjen e rrjetit të transmetimit, modernizimin e pajisjeve, digjitalizimin e arkivit dhe mbështetjen e prodhimeve.
Ministria e Mbrojtjes ka një buxhet të parashikuar prej 76.61 miliardë lekësh për vitin 2027, nga 69.23 miliardë lekë në vitin 2026. Financimi për mbrojtjen është planifikuar në nivelin 2.35% të Prodhimit të Brendshëm Bruto, në kuadër të shpenzimeve për Forcat e Armatosura, modernizimin e kapaciteteve ushtarake dhe përmbushjen e angazhimeve të Shqipërisë në NATO.
Gjatë shqyrtimit në komision, Ministria e Mbrojtjes ka kërkuar ndryshimin e shpërndarjes së 1.2 miliardë lekëve ndërmjet programeve të saj, pa rritur shumën totale të buxhetit. Kërkesa është paraqitur me shkresën e datës 9 nëntor 2026 dhe lidhet me shpenzimet kapitale.
Sipas propozimit, programit të Arsimit Ushtarak do t'i shtohen 400 milionë lekë për vijimin e projektit të Fakultetit të Arsimit Ushtarak, ndërsa programit «Mbështetja e Luftimit» do t'i shtohen 800 milionë lekë për kapacitetet teknike dhe infrastrukturore, ku përfshihet edhe Agjencia e Inteligjencës dhe Sigurisë së Mbrojtjes.
Për të siguruar këto fonde, Ministria kërkon pakësimin me 1.15 miliardë lekë të programit «Forcat e Luftimit» dhe me 50 milionë lekë të programit «Planifikimi, Menaxhimi dhe Administrimi». Ndryshimi neto në buxhetin e ministrisë është zero lekë.
Edhe për vitet 2028 dhe 2029 është kërkuar një rishpërndarje prej 1.22 miliardë lekësh në vit, nga programi «Forcat e Luftimit» drejt Arsimit Ushtarak.
Agjencia e Inteligjencës dhe Sigurisë së Mbrojtjes ka një buxhet të parashikuar prej 614 milionë lekësh, nga 522.8 milionë lekë në vitin 2026. Rritja është 91.2 milionë lekë, ose 17.4%.
Në kërkesat paraprake, Agjencia kishte paraqitur nevojën për 448.2 milionë lekë për paga dhe sigurime shoqërore, kundrejt tavanit prej 350 milionë lekësh, si dhe 178.3 milionë lekë për shpenzime të tjera korrente, kundrejt 118 milionë lekëve të planifikuara. Për investime kapitale, nevojat e paraqitura arrinin në 809.28 milionë lekë, kryesisht për sistemet e inteligjencës, digjitalizimin, komunikimet e sigurta dhe infrastrukturën teknologjike.
Rishpërndarja prej 800 milionë lekësh e kërkuar nga Ministria e Mbrojtjes i përket programit «Mbështetja e Luftimit», ku përfshihet Agjencia, dhe jo një fondi të përcaktuar tërësisht për të.
Ministria e Punëve të Brendshme ka një buxhet të parashikuar prej rreth 36.7 miliardë lekësh, nga të cilat 30.3 miliardë lekë i përkasin programit të Policisë së Shtetit.
Për Policinë e Shtetit, një nga zërat kryesorë është fondi prej 3.3 miliardë lekësh për politikën e rritjes së pagave. Ky fond është përfshirë në projektbuxhet dhe nuk përbën kërkesë shtesë të pambuluar.
Nga politika e re e pagave parashikohet të përfitojnë 8,500 punonjës të policisë. Për gradën inspektor, paga bazë për gradë është propozuar të rritet nga 73 mijë në 93 mijë lekë, ndërsa për kategori të tjera janë parashikuar shtesa nga 10 mijë deri në 15 mijë lekë.
Buxheti bazë i programit të Policisë së Shtetit rritet me 2.4% krahasuar me vitin 2026. Me përfshirjen e fondit për politikën e re të pagave, rritja arrin në rreth 16%.
Nga fondet e programit, 20.2 miliardë lekë janë për personelin, pa përfshirë politikën e re të pagave, 5.6 miliardë lekë për mallra, shërbime dhe transferta, 2.5 miliardë lekë për investime me financim të brendshëm dhe 2 miliardë lekë për investime me financim të huaj.
Për Gardën e Republikës, projektbuxheti parashikon 2.8 miliardë lekë, me rritje prej rreth 3% krahasuar me vitin 2026.
Garda ka paraqitur nevoja për investime në vlerën rreth 292 milionë lekë, ndërsa fondi i planifikuar për investime është 110 milionë lekë. Për këtë fond, institucioni ka kërkuar një ndarje prej 55.5 milionë lekësh për mjete transporti, 18.06 milionë lekësh për integrimin e sistemeve të sigurisë dhe kamerave, 32 milionë lekësh për rikonstruksionin e objektit të ruajtjes së rezidencave në Vlorë dhe 4.44 milionë lekësh për pajisje të mbrojtjes nga incidentet.
Në Programin Buxhetor Afatmesëm 2027–2029, Garda ka evidentuar 16 projekte investimi.
Përveç investimeve, në komision është propozuar edhe shqyrtimi i rritjes së pagave për punonjësit e Gardës, me synim përafrimin e tyre me pagat e kategorive përkatëse të Policisë së Shtetit.
Komisioni e ka mbështetur këtë propozim dhe i ka kërkuar Ministrisë së Financave, në bashkëpunim me Gardën, të përllogarisë numrin e punonjësve përfitues, nivelin e rritjes, koston vjetore dhe burimin e financimit. Në raport nuk është përcaktuar ende një shumë konkrete për këtë politikë pagash.
Drejtoria e Përgjithshme e Burgjeve ka një buxhet të parashikuar prej 9.85 miliardë lekësh për vitin 2027, nga 9.82 miliardë lekë në vitin 2026. Rritja është vetëm 30 milionë lekë, ose 0.3%.
Përtej këtij financimi, institucioni ka kërkuar 2.36 miliardë lekë shtesë, nga të cilat 1.61 miliardë lekë për investime kapitale dhe 750 milionë lekë për shpenzime korrente.
Në kërkesat për investime përfshihen 500 milionë lekë për pajisje të Policisë së Burgjeve, 515 milionë lekë për sisteme sigurie dhe kontrolli, 120 milionë lekë për ndërhyrje infrastrukturore, 60 milionë lekë për ambiente trajnimi dhe 50 milionë lekë për zëvendësimin e pajisjeve të amortizuara.
Për shpenzimet korrente, Drejtoria e Burgjeve ka kërkuar 450 milionë lekë për kompensimin me ushqim të punonjësve të Policisë së Burgjeve dhe 300 milionë lekë për uniformat.
Për Agjencinë Kombëtare të Mbrojtjes Civile janë parashikuar 5.109 miliardë lekë, ku përfshihen edhe fondet që administrohen për mbrojtjen civile dhe mbështetjen e pushtetit vendor.
Agjencia ka kërkuar 200 milionë lekë shtesë për mbështetjen e bashkive në parandalimin dhe përballimin e fatkeqësive natyrore, si dhe për rehabilitimin e infrastrukturës së dëmtuar.
Fondi i kërkuar lidhet me rastet kur kapacitetet financiare të bashkive nuk mjaftojnë për përballimin e emergjencave. Kërkesa nuk është për shpenzimet administrative të Agjencisë, por për financimin e ndërhyrjeve në njësitë vendore.
Drejtoria e Përgjithshme e Rezervave Materiale të Shtetit ka një buxhet të parashikuar prej 183.31 milionë lekësh, ndërsa ka kërkuar 209.87 milionë lekë shtesë.
Nga kjo shumë, 51.87 milionë lekë kërkohen për shërbimin e ruajtjes dhe sigurisë së objekteve dhe rezervave materiale, ndërsa 158 milionë lekë për investime.
Investimet përfshijnë 90 milionë lekë për çadra strehimi, 24 milionë lekë për kontejnerë banimi dhe tualeti, 23 milionë lekë për materiale higjienike, 12 milionë lekë për pajisje elektroshtëpiake, 7 milionë lekë për pajisje kompjuterike dhe 2 milionë lekë për pajisje zyre.
Agjencia e Mbikëqyrjes Policore ka një buxhet të parashikuar prej 356.8 milionë lekësh, nga 405.7 milionë lekë në vitin 2026. Financimi ulet me 48.9 milionë lekë, ose 12.1%.
Në pasqyrën e plotë të nevojave financiare, AMP ka kërkuar 315.29 milionë lekë shtesë. Kërkesa përfshin 92.82 milionë lekë për paga, 15.42 milionë lekë për sigurime shoqërore dhe shëndetësore, 35.8 milionë lekë për mallra dhe shërbime, 8.25 milionë lekë për transferta ndaj individëve dhe 163 milionë lekë për investime.
Nga fondet e kërkuara për paga dhe sigurime, 108.24 milionë lekë lidhen me zgjerimin e strukturës me 54 punonjës dhe përmirësimin e trajtimit financiar.
Për investimet teknologjike janë evidentuar 78 milionë lekë për pajisje të sigurisë së rrjeteve dhe 80 milionë lekë për rinovimin e pajisjeve elektronike dhe sistemeve të Agjencisë.
Raporti përmban edhe një kërkesë më të kufizuar prej 202.05 milionë lekësh, që lidhet kryesisht me investimet dhe shpenzimet operative. Shuma prej 315.29 milionë lekësh përfshin edhe nevojat për personelin dhe sigurimet shoqërore.
Për Agjencinë e Mbikëqyrjes në Sistemin e Ekzekutimit të Vendimeve Penale janë parashikuar 343.3 milionë lekë. Nga kjo shumë, 244.2 milionë lekë janë për paga dhe sigurime shoqërore, 33.6 milionë lekë për shpenzime operative dhe 65.5 milionë lekë për investime.
Investimet përfshijnë 10 milionë lekë për pajisje kompjuterike, 5.5 milionë lekë për orendi dhe pajisje zyre, 20 milionë lekë për mjete transporti dhe 30 milionë lekë për pajisje dhe mbështetje të strukturave operacionale. Për këtë institucion nuk rezulton një kërkesë shtesë e veçuar mbi fondet e parashikuara.
Autoriteti Kombëtar për Sigurinë e Informacionit të Klasifikuar ka një buxhet të parashikuar prej 114.27 milionë lekësh, nga 106.48 milionë lekë në vitin 2026.
Institucioni ka kërkuar 35 milionë lekë shtesë për dy investime që nuk janë përfshirë në tavanet e projektbuxhetit. Nga kjo shumë, 5 milionë lekë kërkohen për blerjen e një automjeti dhe 30 milionë lekë për pajisje të specializuara për identifikimin dhe bllokimin e sinjaleve të paautorizuara audio, video dhe radiofrekuencë.
Për Shërbimin Informativ të Shtetit, projektbuxheti parashikon 3.08 miliardë lekë, me rritje prej 2.8% krahasuar me buxhetin fillestar të vitit 2026.
Në tabelën përmbledhëse të kërkesave shtesë, SHISH ka kërkuar 260.019 milionë lekë për funksionimin institucional dhe kryesisht për realizimin e investimeve të planifikuara. Me përfshirjen e plotë të kërkesës, financimi do të arrinte në rreth 3.34 miliardë lekë.
Raporti përfshin edhe financimin e pushtetit vendor. Për vitin 2027, buxheti vendor parashikohet në rreth 114.6 miliardë lekë, me rritje prej 2.4% krahasuar me nivelin e pritshëm të vitit 2026.
Nga kjo shumë, 29.3 miliardë lekë janë transferta e pakushtëzuar e përgjithshme, 19.9 miliardë lekë transferta e pakushtëzuar sektoriale, 200 milionë lekë granti i performancës dhe rreth 65.2 miliardë lekë të ardhura të tjera të pushtetit vendor.
Transferta e pakushtëzuar e përgjithshme rritet me rreth 1.5 miliardë lekë krahasuar me buxhetin fillestar të vitit 2026. Në relacion përfshihet edhe mbështetja prej rreth 4.5 miliardë lekësh për politikën e pagave në nivel vendor.
Gjatë shqyrtimit nen për nen, komisioni ka propozuar edhe ndryshimin e formulës së ekualizimit të transfertës së pakushtëzuar për bashkitë.
Sipas formulimit të propozuar, bashkitë me të ardhura për frymë nën 92% të mesatares kombëtare prej 1,488 lekësh për frymë do të kompensohen deri në nivelin 1,369 lekë për frymë. Për bashkitë me të ardhura mbi 124% të mesatares kombëtare, ose mbi 1,845 lekë për frymë, parashikohet zbritja e 71.8% të diferencës mbi këtë prag./Pamfletibuxheti fonde spak policia Dokumenta bashkëngjitur Lini një Përgjigje Anuloje përgjigjen Ekonomi FMN i prish llogaritë Ramës: Buxhetit 2027 i mungojnë 8,8 miliardë lekë për të përmbushur rekomandimet! 21 Nëntor 2026, 14:0014:00Ekonomi Kursi i këmbimit 21 nëntor, me sa shiten dhe blihen sot euro dhe dollari 21 Nëntor 2026, 07:1807:18Ekonomi FMN kritikon paketën fiskale 2027: Ndihma të shkojë direkt te familjet në nevojë 20 Nëntor 2026, 20:5720:57Ekonomi FMN kërkon reformimin e pensioneve: Bonuset e përkohshme nuk zëvendësojnë ndryshimet në sistem 20 Nëntor 2026, 20:3120:31Ekonomi Si pensionet po ‘hanë’ buxhetet e shteteve të pasura 20 Nëntor 2026, 17:0817:08Ekonomi Sa poshtë mund të zbresë euro? Rënia historike nën 90 lekë dhe çfarë pritet më tej 20 Nëntor 2026, 16:1516:15Ekonomi

