Shkencëtarët kanë arritur për herë të parë të krijojnë në laborator një lente realiste të syrit të njeriut nga qelizat burimore, një arritje që potencialisht mund të hapë rrugën për trajtime të reja të kataraktit dhe sëmundjeve të tjera të syrit. Katarakti është një sëmundje e syrit që shfaqet kur thjerrëza natyrale e syrit bëhet e turbullt, duke shkaktuar shikim të mjegullt ose të paqartë.Lexo edhe:Pse shtatzënitë me interval të shkurtër mund të përshpejtojnë plakjen Në një zbulim të ri shkencor, studiuesit nga Universiteti Anglia Ruskin (ARU) në Mbretërinë e Bashkuar krijuan në laborator këto “mini-lente”. Ekipi, në të cilin bëjnë pjesë edhe ekspertë nga Universiteti i Cardiff-it dhe Universiteti i Osakës në Japoni, tha se këto lente i ngjajnë shumë lentes natyrale që ndodhet brenda syrit të njeriut. Shpresohet që këto lente të reja të mund të përdoren tashmë për testimin e barnave të reja dhe për të kuptuar më mirë sëmundjet e syrit. Studiuesit thanë se këto lente mund të “kontribuojnë gjithashtu në zhvillimin e trajtimeve rigjeneruese në të ardhmen”, pasi zbuluan se ato mund të imitojnë disa nga proceset natyrore rigjeneruese që ndodhin gjatë zhvillimit të lentes. Profesoresha Barbara Pierscionek, nga Qendra për Biomjekësi dhe Inovacion në Shëndetësi në Universitetin Anglia Ruskin, tha: “Ky është një hap i madh përpara, pasi është shumë e vështirë të sigurohet dhe të studiohet indi i lentes së syrit të njeriut gjatë procesit të zhvillimit të saj. Tashmë kemi arritur me sukses të rrisim në laborator inde miniaturë të lentes së syrit të njeriut nga qelizat burimore dhe kemi identifikuar kushtet e nevojshme që ato t’i ngjajnë sa më shumë një lenteje natyrale të syrit të njeriut. Ndërsa teknologjia zhvillohet, këto inde të krijuara në laborator mund të na ndihmojnë të testojmë barna të reja, të kuptojmë më mirë sëmundjet që ndikojnë në shikim dhe potencialisht të kontribuojmë në zhvillimin e trajtimeve rigjeneruese në të ardhmen.” Në revistën shkencore npj Regenerative Medicine, studiuesit përshkruan procesin e zhvillimit të lentes. Ata përdorën qeliza të rritura, të cilat ishin riprogramuar në një gjendje të ngjashme me atë të qelizave burimore. Universiteti Anglia Ruskin bëri të ditur se shkencëtarët më pas zhvilluan një metodë rritjeje që nxiste qelizat të organizoheshin vetë në struktura të ngjashme me lentet. Autorët raportuan se këto lente zotërojnë shumë nga karakteristikat kryesore biologjike që gjenden në lentet e vërteta të syrit të njeriut. Ata thanë gjithashtu se qelizat nga këto mini-lente mund të krijojnë struktura të reja të ngjashme me lentet. Shpresohet që ky zbulim një ditë të ndihmojë në zhvillimin e trajtimeve për sëmundje të tilla si katarakti, i cili shfaqet kur lentja e syrit bëhet e turbullt. Me kalimin e kohës, katarakti përkeqësohet dhe mund të kërkojë ndërhyrje kirurgjikale për përmirësimin e shikimit. Kjo ndërhyrje përfshin zëvendësimin e lentes së turbullt të syrit me një lente artificiale./DPA News
