Studiuesit në Qendrën Mjekësore të Universitetit të Mastrihtit, në Holandë, kanë zbuluar se konsumimi i përditshëm i kikirikëve të pjekur me lëkurë, pa kripë, mund të ndihmojë në përmirësimin e reagimit ndaj insulinës në disa zona të trurit te personat e moshuar. Studimi, i publikuar në revistën shkencore Food & Function, përfshiu 31 të rritur të shëndetshëm, të moshës 60 deri në 75 vjeç. Atyre iu kërkua të konsumonin çdo ditë 60 gramë kikirikë, ose afërsisht dy racione, për një periudhë prej 16 javësh.Lexo edhe:Ushqimet ultra të përpunuara dhe rreziku për zemrën, studimi zbulon çfarë ndodh në gjak Gjatë fazës tjetër të studimit, pjesëmarrësit duhej të shmangnin plotësisht konsumimin e kikirikëve për 16 javë. Më pas, ata kaluan në regjimin tjetër ushqimor, duke u mundësuar studiuesve të krahasonin efektet e të dyja mënyrave të të ushqyerit. Pas 16 javësh, studiuesit konstatuan se ndjeshmëria ndaj insulinës ishte përmirësuar në disa zona të trurit, të përfshira në proceset e kujtesës dhe në funksione të tjera njohëse, veçanërisht në anën e djathtë të trurit. Këto zona përfshinin pjesë të hipokampusit, girusit lingual, girusit parahipokampal dhe girusit cingular posterior. Studiuesit mendojnë se disa lëndë ushqyese dhe përbërës natyralë që gjenden te kikirikët mund të veprojnë së bashku për të mbështetur shëndetin e trurit. Sipas tyre, përfitimet nuk mund t'i atribuohen vetëm një lënde ushqyese të veçantë. Autori kryesor i studimit, Dr. Peter Joris, shpjegoi se insulina luan një rol të rëndësishëm në tru, pasi ndihmon në mbështetjen e kujtesës dhe të aftësive të tjera të të menduarit. Megjithatë, me kalimin e moshës, truri mund të bëhet më pak i ndjeshëm ndaj insulinës. Ky ndryshim është lidhur me rënien e aftësive njohëse./DPA News
