Një objekt kyç energjetik që furnizon me ngrohje dhe energji elektrike kryeqytetin ukrainas, Kiev, është goditur nga raketa balistike ruse. Presidenti i Ukrainës, Volodymyr Zelensky, bëri të ditur se në shënjestër të sulmit ishte termocentrali Darnytska CHP-4, si dhe një ndërtesë banimi. Kryebashkiaku i Kievit, Vitali Klitschko, njoftoi se nga sulmi me raketa, i ndodhur të martën në mbrëmje, dy persona humbën jetën dhe 21 të tjerë mbetën të plagosur. Sipas tij, janë goditur edhe disa objekte të tjera energjetike në kryeqytet. Në orët e para të së mërkurës, Klitschko njoftoi se sulmet masive me raketa kishin shkaktuar ndërprerje të energjisë elektrike në disa zona të Kievit. Autoritetet u bënë thirrje banorëve të qëndrojnë në strehimore, pasi ishte shpallur alarm për kërcënim nga raketat. Presidenti ukrainas Volodymyr Zelensky reagoi ashpër pas sulmeve, duke deklaruar se Ukraina kishte mbështetur një armëpushim për infrastrukturën energjetike, por Rusia vijonte të godiste objektet që furnizojnë popullsinë me energji dhe ngrohje. “Ukraina mbështeti një armëpushim energjetik. Rusia po synon edhe një termocentral tjetër dhe jetën e popullit tonë”, deklaroi Zelensky. Ai e cilësoi të padrejtë situatën, duke theksuar se infrastruktura energjetike e vendit po shkatërrohet, ndërsa Ukraina, sipas tij, nuk po merr as paralajmërime paraprake për lëshimin e raketave balistike.
Zelensky u bëri thirrje ndërkombëtarëve të mos heshtin për sulmet dhe kërkoi që Shtetet e Bashkuara të shohin se çfarë po ndodh në terren dhe kush, sipas tij, mban përgjegjësi për vazhdimin e luftës.
Sulmi i së martës shënon natën e dytë radhazi që Kievi goditet nga raketat ruse, pavarësisht deklaratave të presidentit amerikan Donald Trump se Rusia dhe Ukraina kishin rënë dakord për një armëpushim energjetik.
Termocentrali CHPP-4 është një objekt i rëndësishëm për furnizimin me ngrohje dhe energji elektrike të distriktit Dniprovskyi dhe pjesëve të distriktit Darnytskyi në Kiev.
Objekti është goditur disa herë që nga nisja e luftës dhe, në shkurt të këtij viti, pësoi dëme të rënda nga një tjetër sulm me raketa ruse, çka detyroi ndërprerjen e funksionimit të tij.
Sipas të dhënave të raportuara nga Reuters, ai sulm la më shumë se 1,000 ndërtesa banimi pa ngrohje dhe ujë të ngrohtë, si dhe preku 47 shkolla, 72 kopshte dhe 18 institucione mjekësore.
Sulmet e fundit shtojnë shqetësimet për sigurinë energjetike të Ukrainës, ndërsa vendi përballet me dëmtime të përsëritura të infrastrukturës jetike dhe përpjekjet diplomatike për t’i dhënë fund luftës vijojnë. © BalkanWeb Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb