Pesë shtetas shqiptarë, mes tyre gra dhe fëmijë, janë riatdhesuar nga Siria në Shqipëri në kuadër të një operacioni të përfunduar më 26 gusht. Sipas njoftimit zyrtar të Ministrisë për Evropën dhe Punët e Jashtme, kthimi është bërë vullnetarisht pas një procesi të gjatë koordinimi mes institucioneve shqiptare, përfaqësive diplomatike e konsullore dhe autoriteteve të vendeve të përfshira.
Autoritetet bëjnë të ditur se shtetasve të kthyer do t’u ofrohet asistencë pas mbërritjes në Shqipëri, ndërsa do t’u kryhen edhe vlerësime shëndetësore dhe psikosociale. Në realizimin e operacionit kanë kontribuar edhe autoritetet siriane, të cilat kanë mundësuar procedurat e nevojshme dhe tranzitin e shtetasve shqiptarë drejt vendit.
Task-Forca ndërinstitucionale do të vijojë punën për ndjekjen e procesit të rehabilitimit dhe riintegrimit të personave të riatdhesuar. Sipas autoriteteve, angazhimi do të vazhdojë edhe për kthimin e shtetasve të tjerë shqiptarë nga Siria, në rast se krijohen kushtet e nevojshme për një riatdhesim të sigurt.