Shumica e njerëzve ndoshta kujtojnë urdhrat e mprehtë të fëmijërisë për t’u ulur drejt, udhëzime që shpesh shoqëroheshin me paralajmërime ogurzeza për dhimbje të ardhshme të shpinës dhe dëmtime të shtyllës kurrizore. Mënyra se si ulet një person nuk luan rol vetëm në shëndetin e pjesës së poshtme të shpinës, por ndoshta ndikon edhe në ndjenjat e tij ose të saj dhe mund të luajë rol në marrjen e vendimeve, sipas Universitetit McGill, ku psikologë dhe psikiatër zhvilluan kohët e fundit një seri testesh që treguan se njerëzit që ulen drejt kanë gjasa të jenë më dinamikë dhe më pozitivë sesa ata që qëndrojnë të kërrusur.Lexo edhe:Sheqeri në 2 vitet e para të jetës mund të ndikojë në shëndetin edhe 70 vjet më vonë Pjesëmarrësit që u ulën drejt “performuan më mirë në një detyrë që përfshinte marrjen e rrezikut dhe raportuan ndjenja më pozitive sesa bashkëmoshatarët e tyre në grupet e atyre që qëndronin të kërrusur ose në grupin e kontrollit”, thotë ekipi. Rezultatet “ngrenë pyetje interesante” rreth mënyrës se si duhet të organizohen vendet e uljes dhe tavolinat në ambientet e punës, shtojnë ata. Pjesa e eksperimentit që lidhej me marrjen e rrezikut tregoi se pjesëmarrësit që mbanin shtyllën kurrizore drejt fitonin shpërblime, pavarësisht se, ndërsa testi përparonte, përfundimisht merrnin përsipër më shumë rrezik dhe në fund raportuan “ndjenja dukshëm më të larta krenarie”, për të cilat universiteti tha se ishin “të lidhura me një humor pozitiv”. “Kjo sugjeron se ata nuk po vepronin në mënyrë më impulsive, por përkundrazi po angazhoheshin në marrjen më efektive të rrezikut”, tha Jorge Armony nga departamentet e psikiatrisë dhe psikologjisë të McGill-it, i cili paralajmëroi se gjetjet “nuk nënkuptojnë se ndryshimi i qëndrimit të trupit mund të transformojë në mënyrë dramatike jetën e një personi”. Armony dhe Soren Wainio-Theberge paraqitën gjetjet e tyre në British Journal of Psychology, ku thanë se po vijonin kërkimet e mëparshme që sugjeronin se “adoptimi i shprehjeve fizike të emocioneve” mund të ketë “efekte kthyese” në mënyrën se si njerëzit mendojnë dhe veprojnë. Studiuesit thanë se i arritën qëndrimet e ndryshme të trupit duke “ndryshuar thjesht lartësinë e tabletës që pjesëmarrësit përdornin për të përfunduar detyrën”, që do të thotë se testet e tyre ndryshonin nga përpjekjet e mëparshme, pasi nuk u jepnin pjesëmarrësve udhëzime të drejtpërdrejta. Këto ndryshime i shtynë pjesëmarrësit të merrnin, me radhë, një pozicion të drejtë ose të kërrusur, gjë që, sipas ekipit, nxiti “efekte të fuqishme dhe të besueshme të qëndrimit të trupit mbi humorin dhe sjelljen në marrjen e rrezikut”, krahasuar me rastin kur pjesëmarrësve u thuhej të uleshin në një mënyrë ose në tjetrën./DPA News
