Në prag të seancës së sotme plenare të Kuvendit, në zonën pranë Parlamentit janë marrë masa të shtuara sigurie. Gazetari Ergys Gjençaj raporton se është vendosur gardhi metalik i Policisë së Shtetit pranë qendrës tregtare në zonë, ndërsa në terren raportohet për shtim të efektivëve dhe prani të autobotëve me ujë, në pritje të mbërritjes së protestuesve. Seanca e sotme, e 29 tetorit, nis në orën 10:00 dhe është e para pas përplasjeve fizike të javës së kaluar në sallën e Kuvendit. Në rendin e ditës janë parashikuar 12 projektligje, një akt normativ, tri projektvendime dhe një interpelancë me ministrin e Turizmit, Kulturës dhe Sportit, Blendi Gonxhja, të kërkuar nga deputetja demokrate Ina Zhupa. Në sfondin e kësaj seance janë edhe masat disiplinore ndaj gjashtë deputetëve të Partisë Demokratike, të përjashtuar për 60 ditë nga punimet parlamentare pas incidenteve të fundit. Ndërkohë, prania e shtuar e policisë dhe vendosja e gardhit metalik në zonën pranë Kuvendit tregojnë se autoritetet kanë marrë masa për të menaxhuar protestën e paralajmëruar. © BalkanWeb Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
