Një tërmet i vërtetë ka tronditur themelet e futbollit evropian! Për herë të parë, fronti i bashkuar i Evropës kundër planit kontrovers të Gianni Infantinos është thyer në mënyrë spektakolare. Në një kohë kur UEFA dhe Concacaf po ziejnë nga zemërimi, presidenti i Federatës Çeke të Futbollit (FAČR), David Trunda, ka hedhur një “bombë” mediatike duke u bërë lideri i parë evropian që del hapur në mbështetje të projektit famëkeq FIFA Forward Enterprise (FFE) – super-planit prej 20 miliardë dollarësh për shitjen e të drejtave komerciale të Botërorit.
Deklarata që tronditi UEFA-n
Në një intervistë ekskluzive dhe shpërthyese për Sky News, Trunda – i cili ka vetëm pak më shumë se një vit në krye të futbollit çek, nuk i ka kursyer elozhet për numrin një të FIFA-s, duke injoruar plotësisht paralajmërimet e ashpra të UEFA-s.
“Mund t’i shoh përfitimet pragmatike për futbollin çek nga bashkëpunimi i ngushtë me Gianni Infantinon dhe ekipin e tij,” – deklaroi Trunda pa ngurrim. “Jam zgjedhur pak më shumë se një vit më parë, dhe për mua personalisht të gjitha projektet që kam përjetuar në bashkëpunim me FIFA-n kanë qenë shumë pozitive për zhvillimin e futbollit evropian.”
“Ryshfet i pastër” apo shpëtim financiar?
Kjo lëvizje e papritur e Çekisë vjen në një moment kritik dhe tepër të tensionuar. FIFA u ka vendosur një ultimatum 211 federatave anëtare: kush pranon propozimin deri më 19 shtator do të përfitojë plot 40 milionë dollarë, ndërsa ata që refuzojnë do të marrin vetëm thërrime nga kjo sumë marramendëse. Kjo taktikë presioni ka shkaktuar revoltë në prapaskenë, aq sa një zyrtar i lartë i futbollit botëror e ka cilësuar këtë skemë pa doreza si “ryshfet të pastër”.
Përçarja e madhe: A do të ketë një “efekt domino”?
Qëndrimi i Trundës është një goditje e rëndë për presidentin e UEFA-s dhe liderët e tjerë evropianë, të cilët e kanë kundërshtuar me forcë këtë privatizim të futbollit. Vetë UEFA e ka cilësuar planin si “një vijë të kuqe që institucionet drejtuese të futbollit nuk duhet ta kalojnë kurrë”. Por me Çekinë që sapo theu tabunë dhe hapi derën e miliardave të Infantinos, pyetja që po tmerron Nyon-in tani është vetëm një: Kush do të jetë federata e radhës që do të dorëzohet para çekut prej 40 milionë dollarësh? Top Channel