Dy shqiptarë rrezikojnë deri në 18 muaj burg në Belgjikë për përfshirjen e dyshuar në një plantacion të madh kanabisi të zbuluar në Dison. Ngjarja daton në qershor të vitit 2023, kur banorët e rrugës Bonvoisin njoftuan policinë për lëvizje të dyshimta në një fermë të vjetër. Gjatë kontrollit, autoritetet konstatuan konsum të pazakontë të energjisë elektrike dhe zbuluan katër dhoma kultivimi me gjithsej 6.124 bimë kanabisi.
Në banesë u gjet një shqiptar 35-vjeçar, i cili deklaroi se ishte rekrutuar nga Tirana si kopshtar për dy muaj, kundrejt pagesës prej 15 mijë eurosh. Ai pretendoi se nuk e dinte fillimisht se bëhej fjalë për një plantacion kanabisi. Ndërkohë, gjurmët e ADN-së të gjetura në mbulesën plastike të një prej dhomave çuan hetuesit te një tjetër shqiptar, 28 vjeç, i cili ndodhej në burg për një dënim të mëparshëm për posedim arme zjarri. Ai deklaroi se kishte punuar vetëm në transportimin e materialeve dhe nuk e dinte përdorimin e tyre.
Hetimet nuk arritën të identifikonin personat që qëndronin pas plantacionit. Dy shqiptarët janë dëbuar drejt Shqipërisë, ndërsa njëri prej tyre nuk është më i gjurmueshëm dhe tjetri përfaqësohet nga një avokat që kërkon pafajësinë e klientit. Mbrojtja argumenton se gjurma e gjetur në mbulesën plastike mund të jetë krijuar gjatë transportimit të saj. Vendimi i gjykatës pritet të shpallet pas rreth një muaji.