Vendosja e sistemeve të reja të artilerisë nga Norvegjia në afërsi të kufirit me Rusinë ka nxitur reagimin e menjëhershëm të Moskës zyrtare. Zëdhënësi i Presidentit rus, Dmitry Peskov, deklaroi se ushtria ruse e percepton këtë përforcim ushtarak si një kërcënim të drejtpërdrejtë ndaj sigurisë kombëtare, duke paralajmëruar marrjen e masave përgjigjëse. Sipas të dhënave të bëra publike nga ambasadori i Rusisë në Oslo, Nikolay Korchunov, Norvegjia ka dislokuar tashmë një batalion artilerie me katër obusë vetëlëvizës K9 të prodhuar në Korenë e Jugut, të cilët kanë një rreze qitjeje deri në 40 kilometra. Plani ushtarak i Oslos parashikon gjithashtu transferimin e 24 sistemeve të tjera të ngjashme për Brigadën Finnmark deri në fund të vitit 2028, ndërsa deri në vitin 2030 forcat norvegjeze pritet të marrin 16 lëshues raketash MLRS K239 Chunmoo me një rreze veprimi deri në 500 kilometra. Përballë këtij riarmatimi në zonat kufitare, Peskov nënvizoi se veprimet e Oslos po ndiqen nga afër nga strukturat ushtarake të Moskës. “Sigurisht, një forcim i tillë ushtarak që synon vendin tonë, Rusinë, nuk mund të mos perceptohet si një kërcënim për sigurinë e Rusisë. Kjo është një arsye për të marrë masa shtesë për të siguruar sigurinë tonë. Ministria jonë e Mbrojtjes, si dhe shërbimet e tjera përkatëse, po merren me këtë,” – u shpreh zëdhënësi i Kremlinit gjatë konferencës për shtyp. © BalkanWeb Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
