Një studim i ri, i kryer me afro 450 mijë të rritur amerikanë, lidh përdorimin e kanabisit me rritjen e rrezikut për goditje në tru dhe sëmundje kardiovaskulare. Gjetjet, të cilat pritet të prezantohen në konferencën shkencore të vitit 2026 të Shoqatës Amerikane të Zemrës, që mbahet në Çikago nga 6 deri më 9 nëntor, tregojnë se si përdoruesit e rastësishëm, ashtu edhe ata të rregullt të marijuanës, kanë më shumë gjasa të vuajnë nga probleme kardiovaskulare krahasuar me personat që nuk e përdorin atë.Lexo edhe:Studimi zbulon: Truri i nënës krijon lidhje me foshnjën që para lindjes Studiuesit analizuan përgjigjet e sondazheve të mbledhura gjatë periudhës 2020–2024, përmes Sistemit të Mbikëqyrjes së Faktorëve të Rrezikut në Sjellje, të Qendrave Amerikane për Kontrollin dhe Parandalimin e Sëmundjeve (CDC). Personat që deklaruan se përdornin kanabis nga një deri në pesë ditë në muaj kishin 23% më shumë gjasa të raportonin një histori të mëparshme të sëmundjeve kardiovaskulare, krahasuar me ata që nuk e përdornin. Ndërsa personat që konsumonin kanabis nga 16 deri në 30 ditë në muaj kishin 21% më shumë gjasa të raportonin probleme të tilla. "Ky studim ngre shqetësime të rëndësishme për përdorimin e kanabisit dhe shëndetin kardiovaskular, veçanërisht për rrezikun e goditjes në tru", tha për Fox News Digital doktoresha Kristen "Nicke" Worth, mjeke me bazë në Ohajo dhe këshilltare mjekësore në NuggMD, një platformë telemjekësie që ofron vlerësime për përdorimin e marijuanës mjekësore. "Një nga gjetjet që më interesoi veçanërisht ishte se personat që përdornin kanabis vetëm një deri në pesë ditë në muaj kishin një përqindje disi më të lartë të rasteve të raportuara me goditje në tru në të kaluarën, krahasuar me ata që e përdornin më shpesh", shtoi Worth, e cila nuk ishte pjesë e studimit. Përdoruesit që konsumonin kanabis me frekuencë të ulët kishin 40% më shumë gjasa të raportonin se kishin pësuar një goditje në tru, ndërsa te përdoruesit e rregullt kjo përqindje ishte 25%. Studimi nuk zbuloi një lidhje statistikisht domethënëse mes përdorimit të kanabisit dhe infarktit të miokardit. "Kjo nuk është ajo që do të prisnim domosdoshmërisht nga një marrëdhënie e drejtpërdrejtë mes dozës dhe rrezikut, ku ekspozimi më i madh shoqërohet me rrezik më të lartë. Megjithatë, nuk duhet ta interpretojmë këtë si provë se përdorimi më i shpeshtë është më i sigurt", tha Worth. Sipas studiuesve, mënyra e konsumimit nuk ndikoi në rezultatet e studimit. Pavarësisht nëse pjesëmarrësit e tymosnin, e përdornin përmes cigareve elektronike apo e konsumonin në formën e produkteve ushqimore, si karamelet xhelatinoze, rreziku mbetej i njëjtë. "U befasuam", tha autorja kryesore e studimit, doktoresha Aabha Divya, profesore asistente e kirurgjisë kardiotorakale në Shkollën e Mjekësisë të Universitetit Tulane, në një njoftim për shtyp të Shoqatës Amerikane të Zemrës (AHA). "Prisnim që rreziku për sëmundje të zemrës të rritej gradualisht me shtimin e shpeshtësisë së përdorimit të kanabisit, por nuk ndodhi kështu. Si grupi që e përdorte rrallë, ashtu edhe ai që e përdorte shpesh, rezultuan me më shumë gjasa për të zhvilluar sëmundje të zemrës". Studimi vjen në një kohë kur përdorimi dhe tregtimi i kësaj lënde po përhapen gjithnjë e më shumë në SHBA. Sipas ekipit kërkimor, rreth një në gjashtë të rritur deklaroi se kishte përdorur kanabis gjatë muajit të fundit të vitit 2024, krahasuar me një në dhjetë në vitin 2020. Kjo përfaqëson një rritje prej 51% brenda katër viteve. Doktor Robert L. Page II, profesor i farmacisë klinike në Universitetin e Kolorados dhe ekspert vullnetar i Shoqatës Amerikane të Zemrës, i cili nuk ishte përfshirë në studim, tha se këto gjetje vënë në pikëpyetje bindjet e zakonshme mbi sigurinë e kësaj lënde. "Te pacientët që përdorin të dyja, kanabisi është konsideruar gjithmonë si një faktor i parëndësishëm krahas cigareve, por në të vërtetë nuk është kështu", tha Page në një deklaratë për shtyp. "Në përgjithësi, kanabisi po shfaqet gjithnjë e më shumë si një faktor i rëndësishëm që kontribuon në shfaqjen e parakohshme të sëmundjeve të zemrës, si te të rinjtë, ashtu edhe te të moshuarit, duke rritur rrezikun e ngjarjeve të rënda kardiovaskulare". Page shtoi se mjekët duhet t'i pyesin pacientët për përdorimin e marijuanës, njësoj siç bëjnë për konsumin e cigareve dhe alkoolit. Studiuesit evidentuan disa kufizime të rëndësishme të këtij studimi. Duke qenë se ai ishte vëzhgues dhe të dhënat u mblodhën vetëm në një moment të caktuar kohor, rezultatet mund të tregojnë vetëm një lidhje statistikore, por nuk mund të provojnë se kanabisi shkakton sëmundje të zemrës apo goditje në tru. Gjithashtu, të dhënat u bazuan në sondazhe telefonike, çka lë hapësirë për pasaktësi në kujtesën e pjesëmarrësve lidhur me diagnozat mjekësore dhe përdorimin e lëndëve narkotike. Për më tepër, studiuesit nuk analizuan fuqinë e produkteve, përqendrimin e THC-së apo sasinë totale të konsumuar. Gjetjet mbeten paraprake deri në përfundimin e procesit të plotë të shqyrtimit dhe botimit në një revistë shkencore me vlerësim nga ekspertë të fushës.
