Pasi janë mbyllur 10 ditë protestash ku mungon jeta studentore në auditore dhe qytetarët vijojnë të kërkojnë dorëheqjen e kryeministrit Edi Rama, situata në bulevardin “Dëshmorët e Kombit” ka shënuar momente të reja tensioni. Në një lidhje direkte në News24, gazetari Klevin Muka ka raportuar mbi zhvillimet e fundit nga terreni përballë Kryeministrisë. Sipas gazetarit Muka, dita e sotme ka nisur që prej orës 09:00 për shkak të kalendarit parlamentar, duke u zhvendosur për rreth gjashtë orë pranë Kuvendit, para se protestuesit t’i drejtoheshin sërish Kryeministrisë ku qëndruan për rreth tetë orë. Vetëm pak minuta para hyrjes direkt në transmetim, Policia e Shtetit ka ndërmarrë një tjetër mësymje, duke përdorur gaz lotsjellës dhe ujë me presor për të shpërndarë grupin e të rinjve që qëndronin ende të grumbulluar. Në sfond janë parë autobotet e ujit dhe Forcat e Ndërhyrjes së Shpejtë (FNSH) duke u larguar pas ndërhyrjes. Muka e vuri theksin te prania e vazhdueshme e patrullave dhe sirenave të policisë në rrugët kryesore të kryeqytetit—si në zonën e qendrës, Rrugën e Dibrës, Rrugën “Hoxha Tasim”, zonën e Piramidës dhe Rrugën e Elbasanit—të cilat sipas tij përdoren në mënyrë të qëllimshme nga qeveria për të krijuar një ndjenjë pasigurie dhe terrori psikologjik, me qëllim që të pengojnë qytetarët dhe studentët të dalin në shesh. Lidhur me thirrjet për protestën e re kombëtare të ditës së shtunë, gazetari bëri me dije se ka ende një farë konfuzioni sa i takon orarit, ku po diskutohet mes orës 10:00 dhe orës 14:00. Për organizimin e kësaj dite është kërkuar sërish mbështetja e diasporës, duke kujtuar tubimet e mëparshme madhështore gjatë qershorit, korrikut dhe mesit të gushtit, për të mposhtur përpjekjet e qeverisë për të zbehur zërin qytetar. © BalkanWeb Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
