Gati tre milionë klientë të bankës Ueno në Paraguai u përballën me një situatë të papritur në orët e para të së martës, më 3 nëntor. Kur tentuan të kontrollonin llogaritë bankare përmes aplikacionit, në ekran nuk shfaqej më gjendja e parave, por vetëm mesazhi: “Nuk mund të shfaqim gjendjen e llogarisë”. Rreth orës 03:24, aplikacioni i bankës kishte ndërprerë shfaqjen e llogarive të klientëve. Në të njëjtën kohë, Banka Qendrore e Paraguait njoftoi se kishte marrë kontrollin e institucionit financiar dhe se po niste procedurat për likuidimin e tij. LEXO edhe...Kaos te Piramida, protestuesit shkatërrojnë biznesin dhe bankën e nivelit të dytë, u vënë zjarrin edhe luleve! Të maskuarit hipin në majë të godinës Vendimi erdhi pasi autoritetet zbuluan një përkeqësim të gjendjes financiare të bankës, me treguesin e aftësisë paguese që kishte rënë nën 50%. Pas njoftimit, qytetarë të shumtë u mblodhën përpara selisë qendrore të bankës në Asunción dhe 75 degëve të saj në të gjithë vendin, duke kërkuar të tërhiqnin kursimet. Përpara degëve të mbyllura dhe të ruajtura nga forcat e sigurisë, situata u tensionua. Disa klientë kërkonin të merrnin paratë për të paguar ilaçet e fëmijëve të sëmurë, ndërsa të tjerë nuk kishin më mundësi të siguronin as ushqimin e përditshëm për familjet e tyre. 850 milionë dollarë fonde publike në bankën e falimentuar Kriza ka ngritur shqetësime të mëdha edhe për paratë publike. Ueno administronte rreth 850 milionë dollarë fonde shtetërore, përfshirë para të Institutit të Sigurimeve Shoqërore, që përdoren për pensionet dhe kujdesin shëndetësor të punonjësve. Situata ka rikthyer frikën e një krize të ngjashme me atë të Argjentinës, kur qytetarëve iu kufizua mundësia për të tërhequr paratë nga bankat. “Kush do të përgjigjet për kursimet e një jete? A do të ketë pandëshkueshmëri?”, shkruhej në pankartat e protestuesve përpara bankës. Anëtarja e bordit të Bankës Qendrore, Liana Caballero, konfirmoi mbylljen e institucionit financiar. “Ne proceduam me mbylljen e institucionit. As aplikacioni, as kartat dhe asnjë shërbim tjetër nuk janë më aktivë që nga sot”, deklaroi ajo. Autoritetet u përpoqën të qetësonin klientët, duke sqaruar se ligji parashikon një fond garancie për kthimin e depozitave deri në 75 paga minimale për çdo klient, ose rreth 37.700 dollarë. Megjithatë, shqetësimi dhe mosbesimi vijuan mes qytetarëve. Autoritetet kanë nisur procedurat për kthimin e depozitave dhe transferimin e llogarive, por kjo nuk do të thotë se të gjithë klientët i kanë marrë tashmë paratë. Kriza rrëzon presidentin, opozita kërkoi shkarkimin e tij Kolapsi i Ueno Bank u kthye shpejt në një krizë politike për presidentin Santiago Peña, i cili kishte ardhur në pushtet në vitin 2023. Tridhjetë e pesë deputetë kërkuan nisjen e procedurave për shkarkimin e tij, duke e akuzuar për konflikt interesi, keqpërdorim të dyshuar të fondeve të pensioneve dhe mbulim institucional të problemeve që çuan në kolapsin e bankës. Peña kishte qenë aksioner në Grupo Vázquez, grupi që kontrollonte Ueno Bank, deri në mars të vitit 2025. Kjo lidhje biznesi u vu në qendër të kritikave ndaj presidentit dhe mënyrës se si autoritetet kishin mbikëqyrur bankën. Ndërsa presioni politik dhe protestat po shtoheshin, Peña njoftoi të enjten, më 5 nëntor, dorëheqjen nga posti i presidentit. “Kam marrë vendimin të paraqes dorëheqjen nga Presidenca e Republikës. E bëj duke menduar për stabilitetin e vendit tonë, paqen sociale dhe nevojën për të ruajtur institucionet tona demokratike”, deklaroi ai në një videomesazh. Presidenti u kërkoi gjithashtu falje qytetarëve nëse i kishte zhgënjyer dhe theksoi se përparësi duhet të jetë kthimi i kursimeve të depozituesve. Dorëheqja duhet të shqyrtohet nga Kongresi, ndërsa sipas rendit kushtetues të pasimit, zëvendëspresidenti Pedro Alliana është i pari në radhë për të marrë detyrën. Tetë drejtues të bankës të arrestuar, hetimet zbulojnë probleme financiare Ndërkohë, hetimet për kolapsin e Ueno Bank kanë çuar në ndalimin e tetë drejtuesve të saj, mes tyre edhe drejtuesin Miguel Vázquez. Autoritetet bankare kishin zbuluar se institucioni nuk ishte në gjendje të përmbushte kërkesën për rezerva ligjore prej rreth 70 milionë dollarësh. Banka ishte përballur gjithashtu me shqyrtime nga rregullatorët për kredi të dyshuara të tepërta ndaj kompanive të lidhura me Grupo Vázquez. Kriza solli edhe dorëheqjen e kreut të Bankës Qendrore, Carlos Carvallo, i cili më parë kishte drejtuar institucionin financiar që i parapriu Ueno Bank. Prokuroria ka nisur hetimet për përgjegjësitë e drejtuesve dhe personave të lidhur me bankën, ndërsa gjykatat kanë urdhëruar ngrirjen e pasurive në kuadër të hetimit. Nga një bankë me miliona klientë, në qendër të krizës së Paraguait Ueno Bank ishte kthyer në një nga institucionet financiare më të njohura të Paraguait brenda vetëm tre vitesh. Me rreth tre milionë klientë në një vend me pak më shumë se gjashtë milionë banorë, banka kishte zgjeruar me shpejtësi praninë e saj përmes shërbimeve digjitale. Ajo ishte bërë e njohur edhe për reklamat dhe sponsorizimet në futboll, përfshirë klubet Cerro Porteño dhe Olimpia, si dhe stadiumin Defensores del Chaco. Vetëm pak ditë përpara kolapsit, banka kishte promovuar një plan për shtimin e kapitalit me 100 milionë dollarë. Por problemet e zbuluara nga autoritetet financiare çuan në ndërhyrjen e Bankës Qendrore dhe ndërprerjen e shërbimeve. Pasojat u ndien edhe në ekonomi. Shoqata e Importuesve dhe Tregtarëve paralajmëroi një rënie të menjëhershme prej 35% të shitjeve te tregtarët kryesorë të vendit, ndërsa qytetarët nuk mund të përdornin paratë e tyre. Kriza goditi edhe imazhin ekonomik të Paraguait, një vend që gjatë presidencës së Peña-s kishte regjistruar ritme të larta rritjeje ekonomike në Amerikën e Jugut. Banka Qendrore, megjithatë, ka theksuar se problemi i Ueno Bank është një rast i veçuar dhe nuk tregon se i gjithë sistemi bankar i vendit është në krizë. U.D/ReportTv.al banke paraguai Komento Komente Sondazhi i ditës: Cilin mbështesni në përplasjen politike që u hap? Ramën 55.5% Veliajn 22.9% Asnjërin 21.7% Vota total: 577 Sondazhi i ditës: Cilin mbështesni në përplasjen politike që u hap?
