Zelensky, Putin e Trump Rezultatet e zgjedhjeve të mesmandatit në SHBA zhgënjyen mediat shtetërore ruse. Megjithatë, propagandistët e Kremlinit vazhdojnë të shpresojnë se administrata Trump do të kufizojë mbështetjen amerikane për Ukrainën, duke i krijuar Moskës kushte më të favorshme për të imponuar kërkesat e saj… Rezultatet e zgjedhjeve të mesmandatit në Shtetet e Bashkuara shkaktuan zhgënjim të thellë në studiot e mediave shtetërore ruse, ku komentatorët dhe drejtuesit e emisioneve politike kishin shpresuar për një rezultat më të favorshëm për interesat e Kremlinit. Gjatë emisionit të tij radiofonik Full Contact, më 4 nëntor, prezantuesi i televizionit shtetëror rus, Vladimir Solovyov, e përmblodhi situatën me fjalët: «Trumpushka dështoi».
Ndërkohë, Margarita Simonyan, drejtuese e rrjetit shtetëror RT, deklaroi gjatë emisionit Mbrëmja e së dielës me Vladimir Solovyov se presidenti amerikan Donald Trump përfaqësonte shpresën e fundit të Amerikës.
Por, Trump duket se përfaqëson edhe shpresën e fundit të Kremlinit për të arritur kapitullimin pa kushte të Ukrainës, përmes ndërprerjes së mbështetjes amerikane.
Shtetet e Bashkuara vazhdojnë t'i shesin armë Ukrainës dhe t'i ofrojnë informacione të inteligjencës, megjithëse ndihma e drejtpërdrejtë ushtarake dhe financiare u ndërpre në masë të madhe në fillim të vitit 2025. Ndërkohë, kufizimet në shërbimet satelitore Starlink vazhdojnë të krijojnë vështirësi për palën ukrainase.
Megjithatë, Moska kërkon masa shumë më të gjera.
Komentatorët dhe ekspertët e televizioneve shtetërore ruse e pranojnë hapur se synojnë të ndikojnë te presidenti amerikan. Ata besojnë se Ambasada e SHBA-së në Rusi ia përcjell administratës Trump deklaratat e tyre publike.
Kërkesat e tyre përfshijnë arrestimin ose eliminimin fizik të presidentit ukrainas Volodymyr Zelensky, ndërprerjen e shkëmbimit të informacioneve të inteligjencës dhe heqjen e plotë të aksesit të Ukrainës në sistemin Starlink.
Gjatë emisionit të tij radiofonik Full Contact, Solovyov renditi veprimet që, sipas tij, Trump duhet të ndërmarrë, duke nisur me një telefonatë drejtuar Elon Musk.
Kufizimet e funksionimit të Starlink po ndikojnë në aftësitë mbrojtëse të Ukrainës dhe po favorizojnë sulmet ruse ndaj objektivave ushtarake dhe civile. Megjithatë, nuk ka prova që këto kufizime të kenë ardhur si rezultat i drejtpërdrejtë i kërkesave të propagandistëve rusë.
Kriza energjetike dhe sulmet ndaj infrastrukturës ukrainase
Mungesa e vazhdueshme e raketave interceptuese amerikane për sistemet e mbrojtjes ajrore Patriot po e rëndon situatën në Ukrainë.
Sulmet ndaj infrastrukturës energjetike kanë shkaktuar ndërprerje të zgjatura të energjisë elektrike, ndërsa dëmtimet e rrjeteve kanë krijuar probleme edhe në furnizimin me ujë dhe funksionimin e kanalizimeve.
Këto zhvillime kanë nxitur reagime miratuese nga disa komentatorë të mediave shtetërore ruse.
Kristina Busarova, drejtuese e emisionit radiofonik At Dawn, parashikoi publikisht përkeqësimin e kushteve të jetesës për ukrainasit, duke deklaruar: «Ata do të notojnë në jashtëqitjet e tyre».
Në disa programe televizive shtetërore, ekspertët ushtarakë i kanë bërë thirrje Rusisë të shfrytëzojë situatën për të shkatërruar sa më shumë infrastrukturë kritike ukrainase.
Ata përpiqen t'i paraqesin këto sulme si kundërpërgjigje ndaj goditjeve ukrainase mbi objektet ruse të naftës.
Megjithatë, diskutimet për shkatërrimin e urave, hedhjen në erë të digave dhe përdorimin e ndërprerjes së ngrohjes, ushqimit dhe shërbimeve bazë si mjete presioni ndaj popullsisë civile kanë qenë të pranishme në televizionet shtetërore ruse që nga fillimi i pushtimit në shkallë të gjerë të Ukrainës, në vitin 2022.
Një tjetër objektiv i diskutuar publikisht ka qenë nxitja e largimit të miliona refugjatëve ukrainas drejt vendeve evropiane, me synimin për të shtuar presionin mbi Evropën.
Në atë kohë, disa ekspertë rusë pranonin se Moska nuk kishte kapacitetet e nevojshme për t'i realizuar plotësisht këto objektiva.
Por mungesa e raketave Patriot dhe ndërprerjet e shërbimeve Starlink e Starshield kanë krijuar kushte më të favorshme për sulmet ruse ndaj infrastrukturës kritike, duke rritur rrezikun për popullsinë civile.
Kremlini sheh mundësi te qëndrimi i Uashingtonit
Qasja e administratës amerikane ka inkurajuar Kremlinin dhe propagandistët e tij kryesorë. Uashingtoni po ushtron presion ndaj Ukrainës për të pranuar lëshime në kuadër të negociatave, pa e bërë njëkohësisht të qartë se edhe Rusia duhet të ndërmarrë hapa të ngjashëm.
Kjo qasje, argumenton autorja, rrezikon ta zgjasë konfliktin që synon të përfjë. Kërkesat e Kremlinit mbeten të pandryshuara dhe shkojnë përtej territorit ukrainas.
Në bisedimet e fundit, Moska është rikthyer te ultimatumi i dhjetorit 2021, përmes të cilit kërkonte që NATO të tërhiqte praninë dhe kapacitetet e saj ushtarake nga vendet anëtare të Evropës Qendrore dhe Lindore.
Ndërkohë, sondazhet e cituara në programe televizive ruse, përfshirë The Meeting Place, paraqesin një pjesë të opinionit publik rus si kundërshtare të një marrëveshjeje paqeje.
Sipas këtyre sondazheve, të anketuarit që kundërshtojnë një zgjidhje paqësore mbështesin vazhdimin e operacioneve ushtarake, pushtimin e sa më shumë territoreve ukrainase dhe shndërrimin e pjesës së mbetur të vendit në një shtet të varur nga Moska.
Ekspertët e televizioneve shtetërore ruse shprehin bindjen se Shtetet e Bashkuara nuk do t'u kundërvihen këtyre synimeve.
Ata vlerësojnë gjithashtu se Evropa nuk zotëron kapacitetet e mjaftueshme për të zëvendësuar mbështetjen amerikane në teknologjinë satelitore, informacionet e inteligjencës dhe furnizimet me pajisje ushtarake.
Retorika e Simonyan: Ukraina si një shtet që duhet të zhduket
Retorika kundër Ukrainës në televizionet shtetërore ruse vazhdon të përmbajë thirrje dhe krahasime që justifikojnë shkatërrimin e saj.
Gjatë një transmetimi të emisionit Mbrëmja e së dielës me Vladimir Solovyov, Margarita Simonyan e krahasoi Ukrainën me një tumor kanceroz që është përhapur aq shumë, sa rrezikon ekzistencën e të gjithë organizmit.
Ajo e paraqiti Rusinë si një mjek që nuk mund ta trajtojë më sëmundjen me bisturi dhe, për këtë arsye, duhet të përdorë forcën brutale, duke e goditur pacientin me shkop.
Në një tjetër dalje televizive, gjatë emisionit The Right to Know, Simonyan u tall me himnin kombëtar të Ukrainës, i cili nis me fjalët: "Lavdia dhe liria e Ukrainës ende nuk kanë vdekur".
Ajo pretendoi se Ukraina tashmë kishte marrë fund.
Simonyan përshkroi gjithashtu dëshirën e saj për të vizituar Kievin dhe për të shijuar gatimet tradicionale vendase pas përfundimit të luftës, por vetëm nëse konflikti mbyllet sipas kushteve të Rusisë.
Drejtuesja e RT pretendoi se gjatë vizitave të saj në Kiev, përpara luftës, nuk kishte dëgjuar askënd të fliste gjuhën ukrainase.
Ky pretendim u shoqërua me deklaratën e prezantuesit Dmitry Kulikov, sipas të cilit «Kievi është kryeqyteti jugor i Perandorisë Ruse».
Duke përsëritur retorikën që kishte përdorur për Donbasin përpara pushtimit të vitit 2022, Simonyan iu drejtua simbolikisht Rusisë me thirrjen: «Nënë Rusi, ktheje Kievin në shtëpi!».
Paqja sipas kushteve të Moskës
Deklaratat e propagandistëve rusë tregojnë se një pjesë e figurave kryesore të medias shtetërore nuk e konceptojnë paqen si rezultat të një kompromisi mes dy vendeve.
Përkundrazi, ata mbështesin një përfundim të luftës që do t'i mundësonte Rusisë të impononte kontrollin e saj mbi Ukrainën dhe të kufizonte sovranitetin e këtij shteti.
Në këtë kontekst, shpresa e tyre për një ndryshim të politikës amerikane lidhet drejtpërdrejt me dobësimin e aftësive mbrojtëse të Kievit.
Një proces diplomatik që ushtron presion kryesisht mbi Ukrainën, pa kërkuar lëshime të krahasueshme nga Rusia, mund të mos krijojë kushtet për një paqe të qëndrueshme. /Përshtatur nga CEPA/
*Julia Davis është kolumniste e The Daily Beast, themeluese e projektit Russian Media Monitor dhe autore e librit In Their Own Words: How Russian Propagandists Reveal Putin’s Intentions. Qeveria ruse e ka përfshirë në listën e personave ndaj të cilëve ka vendosur sanksione dhe i ka ndaluar hyrjen në Federatën Ruse rusia ukraina paqja Lini një Përgjigje Anuloje përgjigjen Opinion Dhjetë të vërteta në sy kryeministrit 16 Nëntor 2026, 18:0918:09Opinion Pse Shenzheni nuk është Jalta! 16 Nëntor 2026, 13:3513:35Opinion Elisa, pse të habiti sikterisja? 15 Nëntor 2026, 18:5318:53Opinion Asambleja e Babos, kush guxon të flasë? 15 Nëntor 2026, 17:1417:14Opinion Ben Blushi, sipas meje 15 Nëntor 2026, 16:0916:09Opinion A mund ta bëjë gjumin e qetë Edi Rama? 14 Nëntor 2026, 20:0520:05Opinion

