Një paketë e gjerë masash ekonomike, që përfshin pensionistët, punonjësit, fermerët, familjet me fëmijë dhe bizneset, u prezantua mbrëmjen e së shtunës nga kryeministri grek Kyriakos Mitsotakis.
Gjatë fjalimit tradicional për hapjen e Panairit të 90-të Ndërkombëtar të Selanikut, Mitsotakis njoftoi masat që do të hyjnë në fuqi gjatë vitit 2027, me një kosto të përllogaritur nga 1.8 deri në 2 miliardë euro. Disa prej tyre do të shtrihen në kohë dhe do të zbatohen gradualisht deri në vitin 2030.
Një nga grupet kryesore përfituese do të jenë pensionistët. Duke nisur nga 30 nëntori i këtij viti, pensionistët mbi 65 vjeç, personat me aftësi të kufizuara dhe të moshuarit e pasiguruar do të marrin çdo vit një pagesë të përhershme prej 400 eurosh. Shuma është 100 euro më e lartë se ajo që përfitojnë aktualisht.
Mbështetje do të ketë edhe për qiramarrësit. Më 30 nëntor pritet të kryhet një rimbursim në masën e një qiraje mujore, bazuar në pagesat e bëra gjatë vitit 2025. Ndërkohë, mjekët, infermierët dhe mësuesit që punojnë në zonat periferike do të përfitojnë një ndihmë të barabartë me dy qira mujore.
Në tregun e punës, paga minimale në sektorin privat do të rritet në mënyrë graduale. Nga 950 euro në prill të vitit 2027, ajo pritet të arrijë në 1.000 euro bruto deri në janar 2028. Në të njëjtën kohë, kontributet e paguara nga punonjësit do të reduktohen me 0.5%.
Ndryshime do të ketë edhe për administratën publike. Nëpunësit e shtetit do të marrin, duke nisur nga dhjetori 2027, një bonus Krishtlindjesh prej 500 eurosh bruto, duke rikthyer për herë të parë pas më shumë se një dekade një përfitim të tillë. Pagat e tyre do të rriten gjithashtu gradualisht, me rreth 80 euro bruto në muaj, deri në fillim të vitit 2028.
Lehtësime të rëndësishme janë parashikuar edhe për fermerët. Profesionistët e këtij sektori me të ardhura vjetore deri në 20 mijë euro do të përjashtohen nga tatimi mbi të ardhurat. I njëjti kufi do të aplikohet për familjet me tre fëmijë, ndërsa familjet me katër ose më shumë fëmijë do të përfitojnë një bonus më të lartë lindjeje.
Një tjetër nismë e prezantuar nga qeveria është programi “Kursimi për Brezin e Ri”. Përmes tij, prindërit do të mund të depozitojnë deri në 1.200 euro në vit në një llogari në emër të fëmijës, ndërsa shteti do të kontribuojë me të njëjtën shumë. Fondet nuk do të mund të tërhiqen deri në moshën 18-vjeçare dhe, sipas qeverisë, në fund të periudhës kursimi mund të kalojë 60 mijë euro. Shuma mund të përdoret më pas për financimin e studimeve ose nisjen e një biznesi.
Në sektorin e strehimit, qeveria greke do të nisë programin e ri “Shtëpia ime 3”, me një fond prej 2 miliardë eurosh. Paralelisht, është parashikuar një ulje graduale me 30% e çmimit të energjisë elektrike në tregun me shumicë, që synohet të realizohet deri në vitin 2029.
Për të frenuar rritjen e çmimeve të banesave dhe qirave, veçanërisht në zonat ku presioni nga blerësit e huaj është më i madh, qeveria ka njoftuar gjithashtu rritjen e taksës së blerjes së pronës për shtetasit e vendeve jashtë Bashkimit Europian. Për qytetarët nga vende si Kina, Turqia apo Izraeli, taksa do të rritet nga 3% në 15%.
Një tjetër ndryshim do të prekë taksën e pronës, ENFIA. Duke nisur nga marsi 2027, ajo do të hiqet për banesat në vendbanime me deri në 2.000 banorë, ndërsa në Maqedoninë Perëndimore kufiri do të jetë 2.200 banorë.
Mitsotakis e cilësoi paketën si pjesë të “dividendit të rritjes” së ekonomisë greke. Masat vijnë në një kohë kur kostoja e jetesës dhe rënia e fuqisë blerëse vazhdojnë të jenë ndër shqetësimet kryesore të qytetarëve grekë.