Qendra e Shërbimeve Ligjore Evropiane (CELS) ngre shqetësimin për disa raste të raportuara nga biznese dhe klientë aktivë të One Albania, të cilët thonë se kanë marrë njoftime nga kompani të mbledhjes së borxheve për detyrime të prapambetura, pavarësisht se vijojnë të paguajnë rregullisht shërbimet e telefonisë.
Përmes një denoncimi publik, CELS paralajmëron bizneset dhe individët që të tregojnë kujdes ndaj njoftimeve të tilla, të cilat, shoqërohen me paralajmërime për ndjekje gjyqësore dhe përmbarimore brenda një afati prej 10 ditësh. Sipas CELS, në rastet e denoncuara, subjekteve tregtare u janë kërkuar shuma prej rreth 1,000 lekësh të reja për çdo numër kontrate, ndërkohë që ato thonë se janë klientë aktivë të One Albania dhe paguajnë fatura mujore që tejkalojnë 15 mijë lekë. Qendra përmend edhe shoqërinë ODMC Albania si një prej kompanive të përfshira në këto njoftime dhe ngre dyshime për mënyrën e trajtimit të detyrimeve të pretenduara, veçanërisht në rastet kur bëhet fjalë për shuma të vogla financiare. Sipas paralajmërimit të CELS, shqetësimi lidhet me mundësinë që këto detyrime të kalojnë në procedura gjyqësore dhe përmbarimore, duke sjellë kosto shtesë për debitorët, si tarifa gjyqësore, shpenzime avokatie dhe tarifa përmbarimore, të cilat mund të jenë shumë më të larta se detyrimi fillestar. Qendra e Shërbimeve Ligjore Evropiane iu bën thirrje bizneseve që kanë marrë njoftime për kalim kreditori apo detyrime të mbartura që të verifikojnë me kujdes pretendimet përpara se të ndërmarrin veprime financiare.
CELS këshillon që të mos kryhen pagesa të nxituara për detyrime që mund të jenë të parashkruara ose të kundërshtueshme ligjërisht, pasi çdo rast duhet të shqyrtohet në bazë të dokumentacionit dhe rrethanave konkrete.
Në të njëjtën kohë, qendra njofton se ofron asistencë ligjore falas për subjektet tregtare që janë klientë të One Albania, kanë pagesa mujore mbi 15 mijë lekë dhe kanë marrë njoftime të kësaj natyre. © BalkanWeb Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb