Organizata Botërore e Shëndetësisë ka publikuar një raport të ri mbi progresin global në luftën kundër infeksioneve seksualisht të transmetueshme. Raporti, i publikuar gjatë Konferencës së 26-të Ndërkombëtare për AIDS-in dhe në prag të Ditës Botërore të Hepatitit, evidenton rezultatet e arritura, por edhe boshllëqet në financim, akses në trajtim dhe pabarazitë që vijojnë të pengojnë përpjekjet globale.Lexo edhe:Metodë e re e skuqjes me mikrovalë mund t’i bëjë patatet e skuqura shumë më të shëndetshme “Ky raport tregon se çfarë mund të arrihet kur vendet investojnë në shëndetësi, komunitete dhe shkencë. Por tregon gjithashtu se sa shpejt mund të zhbëhet progresi për shkak të ndërprerjeve të financimeve, emergjencave humanitare dhe pabarazive të vazhdueshme”, deklaroi drejtori i përgjithshëm i OBSH-së, Tedros Adhanom Ghebreyesus. Sipas raportit, deri në fund të vitit 2025, rreth 32 milionë persona që jetojnë me HIV po merrnin trajtim. Që nga viti 2010, infeksionet e reja me HIV janë ulur me 42%, ndërsa vdekjet e lidhura me AIDS-in kanë rënë me 57%. Megjithatë, OBSH thekson se rreth 9 milionë persona në botë ende nuk kanë akses në trajtimin jetik kundër HIV-it, ndërsa infeksionet e reja vazhdojnë të rriten në disa rajone, veçanërisht te grupet më të ekspozuara ndaj rrezikut. Rriten rastet e infeksioneve seksualisht të transmetueshme Raporti nënvizon se edhe në luftën kundër hepatiteve virale është shënuar progres. Që nga viti 2015, infeksionet vjetore nga hepatiti B janë ulur me 32%, ndërsa vdekjet nga hepatiti C kanë rënë me 12%. Megjithatë, hepatitet virale mbeten ndër sëmundjet infektive më vdekjeprurëse në botë. Vetëm gjatë vitit 2024, ato shkaktuan rreth 1.3 milionë vdekje, ndërsa numri i viktimave vazhdon të rritet. OBSH paralajmëron se diagnostikimi dhe trajtimi mbeten në nivele të ulëta, sidomos për hepatitin B, pavarësisht ekzistencës së terapive efektive që mund të parandalojnë miliona vdekje. Për infeksionet seksualisht të transmetueshme, progresi global mbetet i pabarabartë. Disa vende kanë përmirësuar diagnostikimin dhe trajtimin e sifilizit gjatë shtatzënisë, ndërsa vaksinimi kundër HPV-së ka shënuar rritje të moderuar. Por OBSH paralajmëron se rastet e IST-ve po shtohen në disa vende, ndërsa rezistenca ndaj antibiotikëve për trajtimin e gonorresë po bëhet një problem gjithnjë e më shqetësues.
