Një nga zonat më historike dhe panoramike të Durrësit, kodra ku ndodhet Vila e Mbretit Zog, po përballet me një projekt të ri ndërtimi që ka ngritur shqetësime për të ardhmen e peizazhit natyror dhe trashëgimisë së zonës.
Siç është njoftuar edhe më parë, në fund të janarit 2026 është miratuar leja e zhvillimit për projektin “Pine Residences”, një kompleks rezidencial dhe hotelerie që parashikohet të shtrihet në një sipërfaqe prej rreth 16 mijë metrash katrorë.
Projekti përfshin godina nga një deri në shtatë kate mbi tokë, apart-hotele, ambiente Wellness dhe SPA, si dhe pishina. Zhvillimi i parashikuar ka rikthyer në vëmendje shqetësimet për ruajtjen e pishave, hapësirave të gjelbra dhe karakterit historik të kodrës.
Në një denoncim të mbërritur në redaksinë tonë, një qytetar shpreh shqetësimin për vështirësitë që hasin këmbësorët dhe rrezikun që ndërtimet e reja t’i lënë vendin betonit në një zonë të njohur për gjelbërimin e saj.
“Te Vila e Mbretit Zog, në mes të Durrësit, kanë bllokuar trotuarin. Turp! Nuk kemi ku të kalojmë, jemi në rrezik. Po bëhen pallate dhe po prishet mjedisi. Aty ka pisha gjithandej, ndërsa tani rrezikojnë t’i presin për të ndërtuar pallate”, thuhet në mesazhin e qytetarit.
Shqetësimi lidhet jo vetëm me ndikimin e mundshëm të projektit mbi peizazhin, por edhe me sigurinë e këmbësorëve dhe ruajtjen e hapësirave publike në një prej zonave me rëndësi historike të qytetit.
Pyetjet që shtrohen janë të qarta: Çfarë masash do të merren për mbrojtjen e pishave dhe të hapësirave të gjelbra? Si do të garantohet kalimi i sigurt i këmbësorëve? Dhe çfarë ndikimi do të ketë ky projekt në identitetin historik dhe mjedisor të kodrës së Vilës së Mbretit Zog?
Ndërsa Durrësi vijon të përballet me presionin e zhvillimit urban, mbetet për t’u parë se si do të harmonizohen planet e ndërtimit me mbrojtjen e mjedisit, sigurinë publike dhe ruajtjen e trashëgimisë së qytetit.