Shtyrja e samitit të NATO-s që ishte parashikuar të mbahej në Shqipëri në vitin 2027 ka marrë vëmendjen e mediave ndërkombëtare. Gjiganti mediatik “Al Jazeera” i kushton një artikull të posaçëm këtij zhvillimi, ku ka vënë në dukje se vendimi vjen në një periudhë kur qeveria e Edi Ramës po përballet me kritika për shpenzimet në fushën e mbrojtjes, si dhe me protesta të vazhdueshme në vend. Në një deklaratë nga Dublini, kryeministri konfirmoi se samiti nuk do të zhvillohet vitin e ardhshëm, ndërsa la të hapur mundësinë që Shqipëria ta presë atë në vitin 2028.
Al Jazeera rikthen gjithashtu në vëmendje dyshimet e raportuara më herët për organizimin e samitit, kundërshtimet e administratës amerikane dhe zhvillimet e brendshme politike, nga protestat e “Revolucionit të Flamingove” te demonstratat studentore dhe akuzat për korrupsion. Reuters zbulon prapaskenat: Administrata Trump kundër samitit të NATO-s në Shqipëri
13 Nëntor, 10:41 Artikulli i Al Jazeera-s: NATO nuk do të mbajë një samit në Shqipëri vitin e ardhshëm siç ishte planifikuar, tha kryeministri Edi Rama, ndërsa qeveria e tij përballet me kritika për shpenzimet e mbrojtjes dhe protesta në vend. Duke folur në Dublin të enjten përpara një takimi të liderëve evropianë, Rama tha se “ende nuk ka një qëndrim të përbashkët se kur do të zhvillohet samiti, sigurisht jo në vitin 2027”. Ai shtoi: “Dhe në vitin 2028, nëse do të jetë një samit, do të jetë në Tiranë.” Një zyrtar i NATO-s tha se samiti i ardhshëm “do të mbahet në Shqipëri”, ndërsa një vendim për datën ende nuk është marrë.
Dyshimet për zhvillimin e samitit
Agjencia Reuters raportoi në muajin qershor se planet për zhvillimin e një samiti në Shqipëri ishin vënë në dyshim për shkak të kundërshtimit nga administrata e presidentit amerikan Donald Trump dhe pakënaqësisë së vendeve anëtare të NATO-s për shpenzimet e ulëta të Shqipërisë në fushën e mbrojtjes. Në deklaratën e samitit të qershorit 2025 në Hagë, liderët e NATO-s thanë se mezi prisnin të takoheshin në Turqi në vitin 2026, “dhe më pas të zhvillonin një takim në Shqipëri”. Megjithatë, deklarata e samitit të korrikut në Ankara nuk përmendi asnjë datë apo vendndodhje për takimin e ardhshëm.
NATO po shqyrton mundësinë e braktisjes së praktikës së fundit të organizimit të samiteve çdo vit. Kjo mund të shmangë një përballje potencialisht të tensionuar me Trump gjatë pjesës së mbetur të mandatit të tij. Diplomatët thonë se aleanca mund të organizojë ende një samit me njoftim të shkurtër gjatë këtij viti, por jo në Tiranë, raportoi Reuters.
Presioni i brendshëm politik
Rama, i cili është në pushtet prej 13 vitesh, është përballur me protesta prej disa muajsh. Protestat nisën në muajin maj, pasi ai dha miratimin paraprak për një resort luksoz, të mbështetur nga Jared Kushner, dhëndri i presidentit amerikan Donald Trump. Resorti parashikohet të ndërtohet në zonën e mbrojtur ligatinore Vjosë-Nartë, në Zvërnec, në bregdetin jugor të Shqipërisë, si dhe në ishullin e afërt të Sazanit.
Të pagëzuara me emrin ‘Revolucioni i Flamingove’, protestat u zgjeruan më pas në protesta më të gjera kundër qeverisë, ku kërkohej dorëheqja e Ramës për shkak të akuzave për korrupsion. Në muajin tetor, protestave iu shtuan edhe protestat e dhunshme të studentëve, të cilët kundërshtonin kushtet në universitete.
Deputetët e opozitës, të udhëhequr nga Sali Berisha, ndërprenë një seancë parlamentare më 29 tetor, duke hedhur flakadanë dhe bomba tymuese në mbështetje të protestuesve. Rama ka refuzuar të japë dorëheqjen dhe deklaron se projekti i resortit është në përputhje me ligjet shqiptare dhe ato të Bashkimit Evropian. Qeveria e tij i ka cilësuar protestat si të organizuara nga kundërshtarët politikë. Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm

