Kushedi nëse mes 88 trupave të pajetë të nxjerrë deri tani nga deti në ujërat spanjolle pranë Ceutës ndodhet edhe shoku i udhëtimit të Mohammedit. Të mërkurën e kaluar ata ishin nisur së bashku nga plazhi Almina në Marok, rreth 14 kilometra larg prej andej. U nisën nga një pikë kaq e largët për të shmangur kapjen, pasi kufiri ishte ende i mbyllur. Ai do të hapej vetëm disa orë më vonë. "U nisëm në orën dy të natës, me pendët e notit në këmbë. Në një moment nuk e dëgjova më. Ishte errësirë dhe mendova se ishte larguar pak," tregon Mohammed. LEXO EDHE:‘Piku’ i sezonit turistik, fluks i lartë pasagjerësh në Portin e Vlorës gjatë fundjavës (VIDEO) Rreth orës 07:00 të mëngjesit, pas pesë orësh not, Mohammed mbërriti në Ceutë dhe kuptoi se shoku i tij ishte përpirë nga dallgët. Ai nuk dëshiron të shkojë në port për të pyetur nëse vullnetarët e Kryqit të Kuq e kanë gjetur trupin e tij, apo nëse ai është një nga 88 viktimat që deri mbrëmjen e djeshme ishin dërguar në morgun e ngritur me urgjencë në ish-spitalin ushtarak për të përballuar tragjedinë më të rëndë të emigracionit në enklavën spanjolle. Megjithatë, trupi i tij mund të jetë edhe mes 11 viktimave të gjetura në ujërat marokene, sipas bilancit të parë të publikuar dje nga Rabati. "Dua një të ardhme" Mohammedi ka frikë se do ta dëbojnë. Ai nuk dëshiron të kthehet në fshatin e tij malor pranë Marrakeshit. "Dua një të ardhme," thotë ai. Në fakt, ai është ende i mitur, vetëm 17 vjeç, dhe nuk mund të kthehet mbrapsht. Me të ndodhet edhe një mik tjetër, Mouaad, i cili është në moshë madhore. Ata po freskohen në plazhin Benítez, disa kilometra larg pikës kufitare Tarajal me Marokun. Janë ndër emigrantët e fundit që kanë mbetur në qytet, pasi dhjetëra mijëra nga rreth 60 mijë personat që kaluan kufirin nga Maroku mes të enjtes dhe të premtes, më pas u kthyen në këmbë. Ata janë gjithashtu ndër të paktët marokenë në këtë plazh, i cili është i mbushur me emigrantë nga Afrika Sub-Sahariane që synojnë të kërkojnë azil. Mes tyre janë edhe Fadeli, Amiri dhe Mohsini, djem 16-17 vjeç që kanë ikur nga makthi i Darfurit në Sudan dhe kanë mbërritur në Marok pas një udhëtimi dy-mujor. "Në Casablanca punonim si muratorë. Na paguanin vetëm dy euro në ditë. Prandaj, sapo u hap kufiri, u nisëm menjëherë," tregon Fadeli. Një familje me tre fëmijë Nën hijen e një peme ndodhet një familje e tërë marokene, me tre fëmijë 7, 8 dhe 1 vjeç, si edhe gjyshja. Qendra e pritjes për emigrantët nuk i ka pranuar, sepse është tejmbushur dhe në prag të kolapsit. Për më tepër, përparësi u jep emigrantëve nga Afrika Sub-Sahariane, pasi ata nuk mund të riatdhesohen menjëherë. "Mbrëmë po flinim në rrugë dhe në orën dy të natës policia na urdhëroi të largoheshim," tregon babai, Said. "Për fat të mirë, njerëzit këtu na ndihmojnë. Na sjellin ujë, ushqime dhe pelena," thotë ai, duke treguar një çift banorësh të Ceutës që kishin mbërritur me motor për t'u sjellë furnizime. Kthimi drejt normalitetit Ceuta po përpiqet t'i kthehet normalitetit duke vendosur në rrugë mbi 2.000 ushtarakë dhe 1.000 efektivë policie. Fillimisht, ata janë dislokuar masivisht në lagjet më qendrore. Për këtë arsye, emigrantët që kanë mbetur, disa mijëra, po fshihen në pyjet e kodrave, në lagjen El Príncipe, ku patrullimet janë më të pakta, si edhe mes shkëmbinjve bregdetarë. Ndërsa emergjenca humanitare po përkeqësohet, me shumë të rinj që vuajnë mungesën e ushqimit, banorët vendas ndodhen mes solidaritetit dhe frikës. Kriza ka shkaktuar përçarje mes popullsisë dhe një përplasje të ashpër politike. Të shtunën në mbrëmje, një grup qytetarësh spanjollë me origjinë marokene protestuan kundër liderit të lëvizjes së ekstremit të djathtë Se Acabó la Fiesta, eurodeputetit Alvise Pérez, i cili u prit me thirrje si: "Po e shfrytëzoni këtë situatë për të përhapur urrejtje" dhe "Po përndiqni më të dobëtit". Ndërkohë, dje, për të shmangur trazirat, Santiago Abascal vizitoi Ceutën në mënyrë thuajse të padukshme, për të ritheksuar linjën më të ashpër të partisë Vox dhe të grupimit Patriotët për Evropën. Kufiri mes Marokut dhe qytetit autonom, tha ai, "duhet të militarizohet në mënyrë të përhershme, për aq kohë sa të jetë e nevojshme", duke akuzuar Rabatin se ka "nxitur një pushtim", një "akt lufte të toleruar dhe të lejuar" nga qeveria e Pedro Sánchez. Lideri i Vox u bëri gjithashtu thirrje banorëve të Ceutës që "të kërkojnë nga qeveria spanjolle ta marrë seriozisht këtë krizë" dhe "të veprojë kundër pushtimit", duke pretenduar se në qytetin autonom ndodhen ende "të paktën 10.000" emigrantë që "duhet të largohen menjëherë". Ai kujtoi gjithashtu se është shpallur "person non grata nga islamistët dhe socialistët e bashkisë, me abstenimin e Partisë Popullore, e cila ka një marrëveshje me Partinë Socialiste". Lidhur me propozimin e kryeministres italiane Giorgia Meloni për pezullimin e Madridit nga zona Shengen, Abascal tha se e konsideron atë "jo një sulm ndaj Spanjës, por ndaj Sánchez-it"./Corriere P.J/Shqiptarja.com TAG: marok emigrante spanje Ceuta Komente Komento Sondazhi i ditës:
31 Korrik, 15:00
Reforma territoriale, cili opsion ju pëlqen më shumë? 46 bashki (PS) 56.3% 100 bashki (PD) 16.2% 61 bashki (si sot) 27.5% Vota total: 3768 Votat totale janë unike Sondazhi i ditës: 31 Korrik, 15:00 Reforma territoriale, cili opsion ju pëlqen më shumë?