Qeveria e Giorgia Melonit do të bëhet brenda tre ditësh qeveria me mandatin më të gjatë në Italinë e pasluftës, duke vendosur një rekord të ri politik në një vend që për dekada është identifikuar me paqëndrueshmërinë qeveritare. Sipas Agence France-Presse, Meloni do të ketë drejtuar të njëjtin kabinet për 1.413 ditë, një ditë më shumë se rekordi i Silvio Berlusconit gjatë katër mandateve të tij si kryeministër. Ajo është gjithashtu gruaja e parë që ka mbajtur postin e kryeministres në Itali. LEXO edhe...Nuk ka vjeshtë edhe shtatori i nxehtë! Temperatura rekord në gjysmën e Evropës "Është sigurisht një burim krenarie", tha për AFP Marco Osnato, deputet i partisë "Vëllezërit e Italisë". Sipas tij, Italia nuk ka pasur kurrë një rol kaq qendror në politikën e jashtme, veçanërisht në Evropë, duke përmendur politikat për emigracionin dhe energjinë, ndërsa shtoi se Roma shihet sot si një aktor i rëndësishëm në Bruksel. Sipas analistëve, rekordi pritet ta forcojë më tej profilin politik të Melonit përpara zgjedhjeve parlamentare të vitit 2027. Italia ka pasur afro 70 qeveri në 80 vitet e fundit, ndërsa partia "Vëllezërit e Italisë" vijon të kryesojë në sondazhe. Megjithatë, zhvillimet e muajve të fundit kanë komplikuar disi rrugën e saj drejt një mandati të dytë. Lorenzo Pregliasco, drejtues i institutit të sondazheve YouTrend, tha për AFP se humbja e Melonit në referendumin për reformën në drejtësi u tregoi votuesve se "mund të ketë një shumicë alternative" ndaj koalicionit të saj. Sipas tij, rezultati hapi gjithashtu debat për performancën e qeverisë. Reforma në drejtësi ishte një nga tre premtimet kryesore të koalicionit qeverisës, së bashku me forcimin e kompetencave të kryeministrit dhe rritjen e autonomisë rajonale. Sipas kritikëve, asnjë prej këtyre objektivave nuk është përmbushur deri tani, ndërsa qeveria nuk ka arritur të zgjidhë problemet strukturore që prej vitesh frenojnë zhvillimin e Italisë. "Kjo periudhë stabiliteti nuk është shfrytëzuar", tha për AFP Chiara Braga, presidente e grupit parlamentar të Partisë Demokratike. Sipas saj, qeveria nuk ka sjellë përmirësim të ndjeshëm të standardit të jetesës së qytetarëve dhe as rritje të konkurrueshmërisë së kompanive italiane. Në planin ekonomik, Italia pritet të regjistrojë një rritje modeste prej 0.6% gjatë vitit 2026, ndërsa pagat reale kanë mbetur pothuajse të pandryshuara që nga fillimi i viteve 1990. Në të njëjtën kohë, Meloni përballet edhe me konkurrencë brenda së djathtës. Roberto Vannacci, ish-gjeneral që sulmon shpesh emigrantët dhe komunitetin LGBTQ+, ka krijuar partinë "E Ardhmja Kombëtare", e cila sipas sondazheve po mbledh rreth 7% të mbështetjes dhe mund të luajë rol të rëndësishëm në zgjedhjet e ardhshme. Koalicioni qeverisës, ku bëjnë pjesë "Vëllezërit e Italisë", Liga e Matteo Salvinit dhe Forza Italia, vazhdon të përfitojë edhe nga përçarjet brenda opozitës së majtë dhe nga rritja e numrit të qytetarëve që nuk marrin pjesë në votime. Në zgjedhjet parlamentare të vitit 2022 pjesëmarrja ishte rreth 64%, niveli më i ulët historik, ndërsa në zgjedhjet evropiane të vitit 2024 ra nën 50%. "Një pjesë e konsiderueshme e elektoratit është vërtet e zhgënjyer dhe e zemëruar", tha për AFP politologu Giovanni Orsina nga Universiteti Luiss në Romë. Sipas tij, problemet kronike të Italisë kanë krijuar bindjen se askush nuk është në gjendje t'i zgjidhë ato. Sondazhet tregojnë se kostoja e jetesës, gjendja e sistemit shëndetësor publik, siguria dhe emigracioni mbeten shqetësimet kryesore të italianëve. Megjithatë, jo të gjithë ndajnë të njëjtin vlerësim. "Njerëzit presin që gjërat të përmirësohen brenda natës", tha për AFP Annamaria, një pensioniste 67-vjeçare dhe mbështetëse e Melonit, e cila nuk pranoi të jepte mbiemrin. "Duhet kohë, por situata po përmirësohet", u shpreh ajo. U.D/ReportTv.al giorgia meloni itali silvio berlusconi Komento Komente Sondazhi i ditës: Bashkia e Tiranës pa drejtues në zyrë, kush e ka përgjegjësinë? Politika 30.8% Drejtësia 65.5% Nuk e di 3.7% Vota total: 2616 Sondazhi i ditës: Bashkia e Tiranës pa drejtues në zyrë, kush e ka përgjegjësinë?
