Mjaftojnë vetëm 30 minuta shi që Radhima të përballet me përmbytje, ndërsa rrugët kthehen në kanale dhe lëvizja bëhet e vështirë për banorët dhe pushuesit.
Reshjet kanë shkaktuar grumbullimin e ujit në rrugë, duke krijuar një situatë që ngre pikëpyetje serioze për gjendjen e infrastrukturës dhe sistemin e kullimit në zonë. Një shi që zgjat vetëm gjysmë ore duket se mjafton për të paralizuar qarkullimin dhe për ta kthyer kalimin nëpër rrugë në një sfidë më vete.
Në vend që uji të largohet përmes kanalizimeve, rrugët mbushen dhe Radhima ngjan më shumë me një qytet të përshkuar nga kanalet, ku për të kaluar duket sikur të duhet një varkë.
Pamjet e situatës ngrenë sërish pyetjen se si është e mundur që vetëm 30 minuta shi të sjellin një gjendje të tillë. Për banorët dhe pushuesit, problemi nuk është vetëm shiu, por edhe pasojat që ai lë pas, duke e kthyer një reshje të zakonshme në një problem serioz për përditshmërinë e tyre.