Vijojnë hetimet për ngjarjen tragjike ku humbi jetën 16-vjeçari me origjinë shqiptare, Gjana Asllan, i cili u plagos rëndë gjatë një ndeshjeje futbolli në stadiumin e Panagias, në Thasos të Greqisë. Autoritetet greke po hetojnë rrethanat e sakta të incidentit, ndërsa në fokus është vendosur edhe siguria e stadiumit ku ndodhi ngjarja. 16-vjeçari, futbollist i Byronas Kavala, u dëmtua rëndë të dielën, vetëm në minutën e dytë të ndeshjes. Gjatë një dyluftimi për topin, ai doli jashtë fushës dhe u përplas me pjesën e pasme të kokës në gardhin ose strukturën rrethuese të stadiumit, duke humbur menjëherë ndjenjat. Pas marrjes së ndihmës së parë në stadium, i riu u transportua drejt spitalit të Kavalës, ku u shtrua në repartin e terapisë intensive. Pavarësisht përpjekjeve të mjekëve, ai ndërroi jetë të martën, më 29 shtator. Ndërkohë, policia e Thasos, në bashkëpunim me Prokurorinë e Kavalës, po zhvillon hetimet për të përcaktuar nëse kushtet e stadiumit përmbushnin standardet e kërkuara të sigurisë. Në veçanti, po shqyrtohet distanca mes vijës së fushës dhe gardhit apo strukturave të tjera rrethuese, duke qenë se pikërisht në këtë zonë ndodhi goditja fatale. Autoritetet pritet të verifikojnë gjithashtu dokumentacionin dhe licencimin e stadiumit, si dhe masat e sigurisë të marra për zhvillimin e ndeshjes ku merrnin pjesë sportistë të mitur. Në kuadër të hetimit pritet të merren edhe dëshmi nga personat që ndodheshin në stadium dhe nga përgjegjësit për organizimin e aktivitetit sportiv. Raporti mjeko-ligjor dhe rezultatet e autopsisë do të jenë gjithashtu pjesë e materialeve që do t’i përcillen prokurorit, i cili do të vlerësojë të gjitha provat për të përcaktuar nëse ekzistojnë përgjegjësi penale për rrethanat e tragjedisë. Humbja e 16-vjeçarit ka shkaktuar dhimbje të madhe në komunitetin sportiv të Kavalës. Klubi Byronas Kavala, ku luante i riu, e ka përshkruar atë si një prej fëmijëve të familjes së klubit, ndërsa ndeshja tragjike ka lënë pas pikëpyetje mbi kushtet e sigurisë në stadiumin ku ndodhi incidenti. © BalkanWeb Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb Etiketa: Greqi shqiptari vdekja
