Të paktën 150 biznese fasonë janë mbyllur, ndërsa mbi 25 mijë qytetarë kanë humbur vendet e tyre të punës brenda pak viteve. Shifrat janë bërë publike nga Shoqata e Manifakturës, gjatë një takimi me sipërmarrës në Elbasan. Gjatë takimit, drejtues dhe sipërmarrës në sektorin fason akuzuan qeverinë se, me politikat e saj, po shkatërron një nga industritë më të rëndësishme eksportuese të vendit. Manifaktura propozon gjashtë masa urgjente që duhet të ndërmarrë shteti për të shpëtuar industrinë eksportuese. Industria e manifakturës po përballet me një nga periudhat më të vështira, ndërsa sektori i fasonerisë vijon të humbasë vende pune dhe kompani. Nga rreth 65 mijë punonjës që kishte dikur kjo industri, sot numri ka zbritur në rreth 40 mijë. Shifrat u bënë publike në një takim të Shoqatës “Manifaktura Shqiptare” me bizneset e sektorit të fasonerisë në qarkun e Elbasanit, kryesisht në fushën e tekstileve.Lexo edhe:SYRI TV/ Degradon infrastruktura në Spitallë, lagja e re pas tërmetit kthehet në 'geto' Sipas të dhënave të shoqatës, nga rreth 700 njësi fasonerie që kanë qenë pjesë e saj, rreth 150 janë mbyllur vitet e fundit. Përfaqësuesit e bizneseve në qarkun e Elbasanit shprehen se situata po vështirësohet vit pas viti. Rënia e euros, rritja e çmimit të naftës dhe kostot e prodhimit, sipas tyre, kanë ndikuar drejtpërdrejt në aktivitetin e fasonerive dhe në marrëdhëniet me partnerët e huaj. Përballë kësaj situate, “Manifaktura Shqiptare” ka propozuar gjashtë masa për t’u përfshirë në Paketën Fiskale 2027, mes tyre lehtësimin e kostos së punës, rritjen e amortizimit fiskal, uljen e tarifave doganore për lëndët e para, lehtësira për fitimin e riinvestuar dhe krijimin e një fondi grantesh për teknologjinë dhe automatizimin.
