Marine Le Pen Shtatë muaj përpara zgjedhjeve që do të përcaktojnë pasardhësin e Emmanuel Macron, Marine Le Pen kryeson me 33-34%. Për herë të parë, problemi i kundërshtarëve të saj nuk është vetëm si ta frenojnë Rassemblement National, por edhe kush do të arrijë të hyjë në balotazh përballë saj. Marine Le Pen është përpara të gjithëve. Shtatë muaj përpara zgjedhjeve presidenciale franceze, gara për Elizenë po merr një formë të pazakontë: kandidatja e Rassemblement National ka krijuar një avantazh të qartë, ndërsa kundërshtarët e saj ende nuk kanë përcaktuar se kush do të jetë rivali kryesor që do të përpiqet t'ia mbyllë rrugën drejt presidencës.
Sondazhet e fundit e vendosin Le Pen në 33-34% në raundin e parë, një pozicion që e bën favorite për të kaluar në balotazh. Për të, ky do të jetë kandidimi i katërt për presidencën, por këtë herë situata është ndryshe nga përpjekjet e mëparshme.
Në vitin 2012 ajo përfi e treta pas François Hollande dhe Nicolas Sarkozy. Në vitet 2017 dhe 2022 arriti në balotazh, por u mund nga Emmanuel Macron. Tani Macron nuk mund të kandidojë përsëri dhe Rassemblement National hyn në betejën për pasardhësin e tij pasi zgjedhjet evropiane të vitit 2024 e konfirmuan si forcën me mbështetjen më të madhe elektorale në Francë.
Edhe trazirat politike që pasuan zgjedhjet e parakohshme parlamentare të vitit 2024 i kanë hapur hapësirë të mëtejshme partisë së Le Pen.
Dënimi i konfirmuar ndaj saj në korrik në çështjen e përvetësimit të paligjshëm nuk e pengoi të kandidonte për Elizenë dhe sondazhet tregojnë se mbështetja e saj ka mbetur e qëndrueshme. Le Pen shpalli kandidaturën dhe, të paktën për momentin, i dha fund pikëpyetjes nëse Rassemblement National do të hynte në garë me të apo me presidentin e partisë, Jordan Bardella.
Bardella mbetet një figurë qendrore, por Le Pen e ka vendosur atë në një rol tjetër: si kryeministër të mundshëm në rast se ajo fiton presidencën.
Megjithatë, të jesh e para në raundin e parë nuk do të thotë automatikisht të marrësh çelësat e Elizesë. Problemi i vërtetë për Le Pen mbetet raundi i dytë.
Për dekada, e djathta nacionaliste franceze është përballur me atë që njihet si “fronti republikan”: kur kandidati i saj afrohej me pushtetin, votues të së djathtës tradicionale, qendrës dhe së majtës bashkoheshin rreth kundërshtarit për ta bllokuar.
Pikërisht ky mekanizëm ndihmoi Macron të mposhtte Le Pen dy herë.
Por sot kjo barrierë nuk duket më po aq e fortë.
Le Grand Continent vëren se “fronti republikan ka humbur forcë” dhe nuk mund të konsiderohet më si një shumicë që zgjohet automatikisht mes dy raundeve. Nëse partitë duan ta rindërtojnë atë, duhet ta krijojnë politikisht.
Kjo është ndoshta risia më e rëndësishme e zgjedhjeve të ardhshme. Le Pen nuk është më thjesht kandidatja që duhet të arrijë në balotazh; ajo duhet trajtuar edhe si një kandidate që mund ta fitojë atë.
Përballë saj, ndërkohë, nuk ka ende një “anti-Le Pen” të qartë.
Emri që aktualisht paraqitet më mirë është Édouard Philippe, ish-kryeministri i Macron dhe kryebashkiaku i Le Havre. Ai vjen nga qendra e djathtë dhe në disa sondazhe arrin në 19-20%, ende dukshëm pas Le Pen.
Philippe kërkon të paraqitet si kandidati i vazhdimësisë institucionale, realizmit ekonomik dhe lidhjes së fortë të Francës me Evropën. Ai po përpiqet gjithashtu ta godasë Rassemblement National në tema si mbështetja për Ukrainën dhe marrëdhëniet me Rusinë.
Por përpara se të përballet me Le Pen, Philippe duhet të fitojë një betejë tjetër: atë për kontrollin e qendrës.
Aty ndodhet edhe Gabriel Attal, një tjetër ish-kryeministër i Macron, me profil më liberal dhe progresist. Tensionet e ditëve të fundit mes Philippe dhe Attal tregojnë se trashëgimia politike e Macron nuk ka ende një trashëgimtar të padiskutueshëm.
Në të majtë po fiton terren Raphaël Glucksmann, i cili mund të shndërrohet në surprizën e garës, ndërsa Jean-Luc Mélenchon vazhdon të ruajë një bazë të konsiderueshme elektorale. Lideri i La France Insoumise lëviz në sondazhet e fundit mes 14 dhe 17% dhe ka treguar në zgjedhjet e vitit 2017 dhe 2022 se mund të rritet ndjeshëm gjatë fushatës.
Kështu, ndërsa Le Pen ka një bllok relativisht të konsoliduar, vota kundër saj është e shpërndarë mes disa kandidatëve dhe disa familjeve politike.
Kjo ndarje është një nga avantazhet e saj më të mëdha.
Le Pen ka ndërtuar prej vitesh një ofertë të dallueshme politike mbi emigracionin, sigurinë, sovranitetin kombëtar, konservatorizmin social dhe kritikën ndaj establishmentit tradicional. Rassemblement National ka forcuar së fundmi edhe bashkëpunimin me Reform UK të Nigel Farage për çështjen e emigracionit të paligjshëm.
Por nëse synon të fitojë presidencën, Le Pen duhet të bëjë diçka më shumë sesa të mobilizojë elektoratin e saj tradicional. Ajo duhet të marrë vota nga e djathta e moderuar dhe ndoshta edhe nga një pjesë e qendrës.
Këtu shfaqet edhe një dilemë brenda vetë Rassemblement National.
Jordan Bardella ka punuar për t'i dhënë partisë një imazh më të moderuar dhe më të pranueshëm për votuesit tradicionalë të së djathtës, biznesin dhe investitorët. Rikthimi i Le Pen në qendër të fushatës ka sjellë një ton më të fortë nacionalist dhe populist.
Shtypi francez ka raportuar edhe për dallime mes tyre mbi disa çështje të rëndësishme, nga politika ekonomike dhe reforma e pensioneve deri te propozimi i diskutueshëm për ndalimin e velit islamik.
Kjo e vendos Rassemblement National përpara një zgjedhjeje delikate: të ruajë tonin që mobilizon bërthamën e tij tradicionale apo të zbusë disa qëndrime për të tërhequr votuesit që mund të vendosin balotazhin.
Në këtë kuptim, Le Pen dhe Bardella përfaqësojnë dy nevoja të së njëjtës parti: të ruajë identitetin që e solli deri këtu dhe njëkohësisht të bindë një pjesë më të gjerë të Francës se është gati të qeverisë.
Për shtatë muajt e ardhshëm, pikërisht kjo do të jetë beteja.
Marine Le Pen duhet të ruajë avantazhin dhe të tregojë se mund ta shndërrojë atë në një shumicë presidenciale. Kundërshtarët e saj, ndërkohë, duhet së pari të zgjidhin problemin e tyre: kush prej tyre mund të bëhet kandidati rreth të cilit do të bashkohen votuesit që nuk duan Le Pen në Elize.
Në zgjedhjet e kaluara, Franca pyeste nëse Marine Le Pen mund të arrinte deri në raundin e dytë. Këtë herë, sondazhet po imponojnë një pyetje tjetër: nëse arrin sërish atje, a ka ende një front mjaftueshëm të fortë për ta ndalur? /Përshtatur nga "Inside Over"marine le pen franca Lini një Përgjigje Anuloje përgjigjen Rajoni dhe Bota Kongresmeni amerikan sulmon Vuçiçin: Po ndjek skenarin e Putinit për të mbajtur pushtetin 5 Shtator 2026, 21:2921:29Rajoni dhe Bota A do të marrë fund lufta? Nis takimi i Putinit me Kushner dhe Witkoff: Situata, mjaft e vështirë 5 Shtator 2026, 20:4720:47Rajoni dhe Bota Merz ngre alarmin para votimit: Nuk do ta lejojmë AfD-në të shkatërrojë Gjermaninë 5 Shtator 2026, 18:5918:59Rajoni dhe Bota Zelensky pranon armëpushimin 3-ditor të Putinit: Nuk sulmojmë, presim të bëjë edhe Moska të njëjtën gjë! 5 Shtator 2026, 18:2518:25Rajoni dhe Bota Njerëzit e Trump zbarkojnë në Moskë, Witkoff dhe Kushner përballë Putinit 5 Shtator 2026, 18:2218:22Rajoni dhe Bota Byroja Antikorrupsion shkund Kievin, hetuesit mbërrijnë deri në zyrën e Kryeprokurorit 5 Shtator 2026, 17:2317:23Rajoni dhe Bota