Pamje nga kamerat e sigurise Nga kamerat e trafikut në Iran te një kamera në një kotec pulash në Izrael, shërbimet e inteligjencës dhe grupet e hakerëve po përdorin pajisjet civile për të ndjekur lëvizjet ushtarake, për të identifikuar objektiva dhe për të kontrolluar rezultatet e bombardimeve. Një investigim i The Wall Street Journal tregon se inteligjenca artificiale e ka zgjeruar këtë praktikë, duke i kthyer kamerat e zakonshme në instrumente të zbulimit ushtarak... Një fermer në veri të Izraelit hapi aplikacionin e telefonit për të kontrolluar pulat e tij, ndërsa forcat amerikane dhe izraelite bombardonin Iranin në fillim të këtij viti. Por kur aktivizoi kamerën e vendosur jashtë kotecit, vuri re se gjuha e aplikacionit kishte ndryshuar në arabisht.
Fermeri njoftoi Drejtorinë Kombëtare të Sigurisë Kibernetike të Izraelit, e cila zbuloi se hakerët kishin marrë kontrollin e kamerës së prodhimit kinez.
Në të vërtetë, hakerët nuk kishin asnjë interes për pulat. Kamera ishte vendosur në një pozicion nga ku mund të ndiqeshin lëvizjet e forcave izraelite pranë kufirit me Libanin. Autoritetet ndërhynë për të forcuar sigurinë e pajisjes dhe për të ndryshuar këndin e saj, në mënyrë që ajo të mos filmonte më operacionet ushtarake.
Ky episod, i dokumentuar nga The Wall Street Journal, tregon një dimension të luftës që po zhvillohet paralelisht me bombardimet, raketat dhe operacionet e inteligjencës tradicionale.
Sipas kompanisë së sigurisë kibernetike S-RM, në botë ekzistojnë rreth 1.2 miliardë kamera të lidhura me internetin. Ato monitorojnë rrugë, ndërtesa, biznese, banesa dhe institucione. Por një pjesë e këtyre pajisjeve mund të kthehen në pika vëzhgimi për shërbimet e huaja të inteligjencës, pa dijeninë e pronarëve.
Alexander Leslie, ekspert i sigurisë kombëtare në kompaninë Recorded Future, e përshkruan këtë zhvillim si shndërrimin e sistemeve civile të mbikëqyrjes në mjete për mbledhjen e inteligjencës gjatë luftës.
Dhe shembujt më konkretë vijnë nga konfliktet në Iran dhe Ukrainë. Si përdori Izraeli kamerat e trafikut në Iran
Sipas investigimit të The Wall Street Journal, Izraeli depërtoi në sistemet e kamerave të trafikut në Iran për të mbledhur informacione që ndihmuan operacionin për vrasjen e udhëheqësit suprem iranian, Ali Khamenei, në fillim të vitit 2026.
Kamerat, të cilat autoritetet iraniane i kishin instaluar për të monitoruar qarkullimin, u shfrytëzuan për të mbledhur informacione mbi lëvizjet në terren.
Kjo mënyrë vëzhgimi i jep inteligjencës një mundësi që dikur kërkonte agjentë të infiltruar, ekipe në terren ose mjete të posaçme zbulimi.
Një kamera e vendosur në një rrugë mund të regjistrojë hyrjet dhe daljet nga një objekt, automjetet që kalojnë, oraret e lëvizjeve dhe ndryshimet në masat e sigurisë.
Megjithatë, Irani dhe grupet e lidhura me të kanë përdorur të njëjtën metodë kundër Izraelit.
Drejtoria izraelite e sigurisë kibernetike deklaroi se gjatë vitit 2026 grupet e lidhura me Iranin kanë depërtuar në më shumë se 250 kamera që autoritetet i konsiderojnë të ndjeshme për sigurinë kombëtare.
Mes tyre përfshihen kamera që lexojnë targat e automjeteve, pajisje pranë objekteve strategjike dhe sisteme vëzhgimi në zonat ku grumbullohen ushtarë, përfshirë postat ushtarake në veri të Izraelit.
Sipas autoriteteve izraelite, numri i përgjithshëm i kamerave të komprometuara është shumë më i madh. Dhjetëra mijëra pajisje kanë dobësi sigurie që mund të shfrytëzohen nga hakerët.
Madje, grupi i lidhur me Iranin, Moses Staff, kishte depërtuar në një kamera sigurie në Jerusalem për të monitoruar shpërthimet në stacionet e autobusëve në vitin 2022, ku mbetën të vrarë dy persona dhe u plagosën më shumë se 20 të tjerë.
Pra, kamerat nuk shërbejnë vetëm për të përgatitur operacione. Ato mund të përdoren edhe për të ndjekur zhvillimin e sulmeve dhe për të vlerësuar pasojat e tyre.
Një kamera në Krime zbuloi një bazë ushtarake ruse
Një nga rastet më domethënëse që dokumenton investigimi lidhet me qytetin e Sevastopolit në Krime, territor ukrainas që Rusia e pushtoi në vitin 2014.
Në fund të vitit 2022, grupi ndërkombëtar i hakerëve Team OneFist, që mbështet Ukrainën, mori kontrollin e një kamere të vendosur në një ndërtesë të lartë pranë bregdetit.
Pozicioni i saj mundësonte vëzhgimin e një hapësire të gjerë të qytetit dhe të Detit të Zi.
Hakerët mund ta rrotullonin kamerën dhe të zmadhonin pamjet. Përmes saj nisën të ndiqnin lëvizjet e helikopterëve, nëndetëseve dhe anijeve ruse.
Gjatë këtij monitorimi, ata ndoqën një helikopter ushtarak rus drejt një zone pranë aeroportit lokal, ku identifikuan një bazë ajrore që nuk e kishin njohur më parë.
Team OneFist ua përcolli informacionin forcave ukrainase, të cilat më pas sulmuan bazën, duke dëmtuar avionë dhe sisteme ruse të mbrojtjes ajrore.
Kjo do të thotë se një kamera civile, e instaluar për një qëllim krejt tjetër, ndihmoi në identifikimin e një objektivi ushtarak.
I njëjti grup depërtoi edhe në kamerat e urës së Kerçit, që lidh Rusinë me Krimenë. Pamjet ndihmuan ukrainasit të studionin masat e sigurisë, përfshirë sensorët e lëvizjes që Rusia kishte instaluar poshtë urës për të penguar sulmet nga uji. Rusia përdor kamerat e banesave për të ndjekur objektivat në Kiev
Por kjo praktikë nuk është ekskluzivitet i Ukrainës.
Në vitin 2024, hakerët rusë morën kontrollin e kamerave të banesave në Kiev, përfshirë një pajisje që një shoqatë banorësh e kishte instaluar për të monitoruar lagjen.
Shërbimi ukrainas i sigurisë, SBU, deklaroi se Rusia synonte të përdorte pamjet për të identifikuar objektiva dhe për të korrigjuar goditjet me raketa ndaj kryeqytetit.
Sipas SBU-së, që nga fillimi i pushtimit rus në vitin 2022, autoritetet ukrainase kanë identifikuar dhe ndërhyrë në rreth 40 mijë kamera që paraqisnin rreziqe të mundshme për sigurinë.
Në disa raste, ato kanë forcuar mbrojtjen e pajisjeve. Në raste të tjera, kanë ndryshuar këndin e filmimit ose kanë bllokuar funksionimin e tyre.
Ndërkohë, operacionet ruse nuk kufizohen vetëm në territorin ukrainas.
Në korrik, shërbimet holandeze të inteligjencës paralajmëruan se aktorë shtetërorë rusë po kryenin operacione sistematike spiunazhi digjital përmes kamerave në Europë.
Sipas tyre, objektivi ishte mbledhja e informacioneve mbi rrugët e transportit ushtarak, dërgesat e armëve drejt Ukrainës dhe vendndodhjen e personelit ushtarak ukrainas.
Kompania CloudSEK zbuloi gjithashtu një server të ekspozuar, që dyshohet se i përkiste një hakeri rusishtfolës, ku ruheshin qindra pamje nga objekte ukrainase të mbrojtjes, energjisë, administratës dhe komunikimeve.
Një pjesë e pamjeve vinin nga zona pranë kufirit të Ukrainës me Rumaninë, vend anëtar i NATO-s. Inteligjenca artificiale po ndryshon mënyrën e spiunazhit
Dallimi kryesor me operacionet tradicionale të inteligjencës qëndron te aftësia për të përpunuar një sasi të madhe informacioni.
Në të kaluarën, agjentët duhej të ndiqnin drejtpërdrejt pamjet dhe të identifikonin lëvizjet e rëndësishme.
Sot, inteligjenca artificiale mund të analizojë materialet e regjistruara, të identifikojë modele të përsëritura dhe të nxjerrë informacione që më pas i shqyrtojnë analistët.
Kristopher Kortright, drejtues i Team OneFist, i tha The Wall Street Journal se inteligjenca artificiale e ka ndryshuar tërësisht këtë veprimtari.
Shërbimet e inteligjencës dhe grupet e hakerëve mund të kërkojnë në internet kamera me mbrojtje të dobët, të provojnë automatikisht një numër të madh fjalëkalimesh dhe të analizojnë pamjet e siguruara.
Kjo krijon mundësinë që mijëra kamera të përdoren njëkohësisht për të monitoruar lëvizje në zona të ndryshme.
Dhe pikërisht këtu lind problemi për institucionet shtetërore, kompanitë dhe qytetarët.
Shumë kamera instalohen nga punonjës që merren me mirëmbajtjen e ndërtesave dhe jo me sigurinë informatike. Pas instalimit, pajisjet mund të vazhdojnë të funksionojnë për vite pa përditësime dhe pa kontroll të rregullt të mbrojtjes së tyre.
Xu Zou, drejtues i lartë për shërbimet e sigurisë në kompaninë Palo Alto Networks, shpjegon se personeli përgjegjës për rrjetet informatike shpesh nuk ka dijeni për të gjitha kamerat e lidhura me internetin brenda një institucioni.
Kështu, një pajisje e vogël sigurie mund të kthehet në pikën më të dobët të një sistemi shumë më të madh. Nga spiunazhi ushtarak te kontrolli i jetës private
Rreziku nuk kufizohet vetëm te objektet ushtarake.
Në vitin 2023, Ondrej Svoboda, një specialist i sigurisë kibernetike në Pragë, po u lexonte fëmijëve kur monitori i kamerës së dhomës nisi të transmetonte zëra dhe muzikë të panjohur.
Ai kuptoi se persona të paautorizuar kishin hyrë në sistem. Më pas dyshoi se dobësia lidhej me një aplikacion tjetër, përmes të cilit kishte tentuar të lidhte kamerat.
Një rast tjetër, i dokumentuar nga S-RM, lidhet me grupin e ransomware-it Akira, i cili shfrytëzoi një kamera të pambrojtur për të anashkaluar mekanizmat e sigurisë së rrjetit të një organizate dhe për të kryer zhvatje.
Pra, kamera nuk është domosdoshmërisht objektivi përfundimtar. Ajo mund të shërbejë si hyrje drejt dokumenteve, postës elektronike dhe pajisjeve të tjera të lidhura në të njëjtin rrjet.
Në konfliktet ushtarake, këtij rreziku i shtohet edhe përdorimi propagandistik i pamjeve.
Grupi i lidhur me Iranin, Handala, ka publikuar mesazhe për të treguar se mund të vëzhgojë dhe dëgjojë qytetarë izraelitë përmes pajisjeve të komprometuara.
Ndërsa hakerët ukrainas kanë ndërhyrë në videokonferenca dhe transmetime ruse, përfshirë aktivitete rekrutimi ushtarak, duke i përdorur ato për mesazhe kundër luftës së Rusisë në Ukrainë.
Në këtë mënyrë, depërtimi në kamera dhe sisteme komunikimi përdoret njëkohësisht për mbledhje informacioni dhe operacione psikologjike.
Investigimi i The Wall Street Journal nxjerr në pah një ndryshim konkret në mënyrën e zhvillimit të luftës. Pajisjet që qytetarët dhe institucionet instalojnë për të rritur sigurinë mund të përdoren nga palë të treta për të identifikuar objektiva dhe për të monitoruar operacione ushtarake.
Rasti i fermerit izraelit, kamerat e trafikut në Iran dhe pajisja e komprometuar në Sevastopol kanë një element të përbashkët: pronarët i kishin instaluar kamerat për qëllime civile, ndërsa hakerët shfrytëzuan pamjet e tyre për interesa ushtarake.
Dhe ky është ndryshimi që po dokumentojnë konfliktet në Ukrainë dhe Lindjen e Mesme. Për të mbledhur informacione nga një territor kundërshtar, nuk është gjithmonë e nevojshme të dërgosh një agjent atje. Në disa raste, mjafton të marrësh kontrollin e një kamere që dikush tjetër e ka vendosur tashmë. /Përshtati Pamfleti nga WSJ/ kamera spiunime sherbimet sekrete Lini një Përgjigje Anuloje përgjigjen Rajoni dhe Bota Trump kërkon largimin e Zelenskyt, Kievi kundërpërgjigjet: Ukrainasit vendosin vetë 11 Tetor 2026, 09:0609:06Rajoni dhe Bota Evropa mesazh të prerë Moskës, Kallas: Nuk është momenti për të zbutur sanksionet! 11 Tetor 2026, 08:5808:58Rajoni dhe Bota Pamje të pazakonta/ Flamingot fshihen në tualet për t’i shpëtuar uraganit (Video) 11 Tetor 2026, 08:4808:48Rajoni dhe Bota Trump bën marrëveshje me Putinin për naftën ruse, por kush do ta paguajë çmimin e paqes në Ukrainë? 11 Tetor 2026, 08:4508:45Rajoni dhe Bota Tensione të reja SHBA-Iran, avioni luftarak amerikan godet një anije mallrash në Gjirin e Omanit 11 Tetor 2026, 08:4008:40Rajoni dhe Bota Fundi i njerëzimit deri në vitin 2100? “The Lancet” paralajmëron për luftën bërthamore dhe rreziqet nga AI 11 Tetor 2026, 08:3008:30Rajoni dhe Bota