Foto nga Prishtina Pas më shumë se tre vitesh gjykim dhe mbi pesë vitesh në paraburgim, katër ish-drejtuesit e UÇK-së do të dëgjojnë të mërkurën aktgjykimin e shkallës së parë për dhjetë akuzat për krime kundër njerëzimit dhe krime lufte. Prishtina është mbushur me flamuj dhe fotografitë e tyre, ndërsa një ekran i madh është vendosur për transmetimin e vendimit. Qindra shqiptarë kanë udhëtuar ndërkohë drejt Hagës. Kosova do t'i ketë sytë nga Haga mëngjesin e së mërkurës. Pas më shumë se pesë vitesh në paraburgim dhe një proces gjyqësor që nisi në prill të vitit 2023, Hashim Thaçi, Kadri Veseli, Jakup Krasniqi dhe Rexhep Selimi do të përballen me momentin vendimtar të një prej proceseve më të rëndësishme të drejtësisë së pasluftës në Kosovë.
Dhomat e Specializuara të Kosovës kanë caktuar 16 shtatorin, në orën 10:00, për shpalljen e aktgjykimit të shkallës së parë. Seanca do të jetë publike dhe do të mund të ndiqet përmes transmetimit të Gjykatës në shqip, anglisht dhe serbisht. Gjykata ka bërë të ditur se kërkesat për ta ndjekur fizikisht seancën kanë qenë veçanërisht të shumta, ndërsa hapësira në galerinë publike është e kufizuar. Në bankën e të akuzuarve do të jenë katër prej figurave kryesore të Ushtrisë Çlirimtare të Kosovës gjatë luftës së viteve 1998-1999. Thaçi ishte drejtues politik i UÇK-së, Veseli lidhej me strukturën e inteligjencës, Krasniqi ishte zëdhënës, ndërsa Selimi ishte pjesë e Shtabit të Përgjithshëm. Të katërt i kanë mohuar akuzat dhe janë deklaruar të pafajshëm.
Përballë tyre qëndron një kërkesë e rëndë e Prokurorisë së Specializuar: 45 vjet burg për secilin prej katër të akuzuarve. Mbrojtja, në anën tjetër, ka kërkuar rrëzimin e akuzave dhe shpalljen e tyre të pafajshëm.
Aktakuza përmban gjithsej 10 pika: gjashtë akuza për krime kundër njerëzimit dhe katër për krime lufte. Për krime kundër njerëzimit, ata akuzohen për përndjekje, burgosje, akte të tjera çnjerëzore, torturë, vrasje dhe zhdukje me forcë. Për krime lufte, akuzat përfshijnë arrestim dhe ndalim të paligjshëm ose arbitrar, trajtim mizor, torturë dhe vrasje. Sipas Prokurorisë, veprat e pretenduara janë kryer nga marsi i vitit 1998 deri në shtator të vitit 1999 në disa zona të Kosovës, por edhe në Kukës dhe Cahan, në veri të Shqipërisë. Prokurorët pretendojnë se viktimat ishin civilë dhe persona që nuk merrnin pjesë në luftime, mes tyre njerëz të perceptuar si kundërshtarë të UÇK-së. Këto mbeten pretendimet e akuzës mbi të cilat trupi gjykues do të japë verdiktin.
Në qendër të përplasjes mes Prokurorisë dhe mbrojtjes gjatë gjithë procesit ka qenë një çështje thelbësore: si ishte organizuar dhe si funksiononte UÇK-ja gjatë luftës dhe sa kontroll real ushtronin katër të akuzuarit mbi njerëzit në terren.
Prokuroria ka argumentuar se Thaçi, Veseli, Krasniqi dhe Selimi ishin pjesë e një “ndërmarrjeje të përbashkët kriminale” dhe se ekzistonte një strukturë që mundësonte ushtrimin e kontrollit dhe zbatimin e një politike ndaj personave të konsideruar kundërshtarë.
Mbrojtja ka kundërshtuar pikërisht këtë themel të çështjes. Sipas saj, UÇK-ja ishte një forcë guerile dhe vullnetare, e krijuar në kushtet e luftës, pa zinxhirin vertikal të komandimit dhe kontrollin efektiv që Prokuroria pretendon se kishin drejtuesit politikë dhe ushtarakë. Procesi gjyqësor nisi më 3 prill 2023, ndërsa Prokuroria e mbylli paraqitjen e provave më 15 prill 2025. Mbrojtja nisi çështjen e saj në shtator të atij viti dhe procedura e provave u mbyll më 18 dhjetor 2025. Palët paraqitën konkluzionet përfundimtare me shkrim në janar, ndërsa deklaratat përmbyllëse u zhvilluan nga 9 deri më 18 shkurt 2026.
Në sallën e gjyqit u dëgjuan 134 dëshmitarë: 125 të Prokurorisë, dy të thirrur nga përfaqësuesi i viktimave dhe shtatë nga mbrojtja. Në proces marrin pjesë 156 viktima.
Mbrojtja e Thaçit solli në Hagë edhe emra me peshë ndërkombëtare. Mes tyre ishte gjenerali amerikan në pension Wesley Clark, ish-Komandant Suprem i Forcave Aleate të NATO-s në Evropë gjatë luftës së Kosovës, si dhe ish-zëdhënësi i Departamentit amerikan të Shtetit, James Rubin. Dëshmitë e tyre u përdorën nga mbrojtja në kundërshtimin e tezës së Prokurorisë për strukturën komanduese dhe kontrollin e UÇK-së. Thaçi, Veseli, Krasniqi dhe Selimi ndodhen në Hagë që prej nëntorit të vitit 2020. Thaçi dha dorëheqjen nga posti i Presidentit të Kosovës pasi u konfirmua aktakuza, ndërsa të katërt kanë qëndruar në paraburgim gjatë procesit dhe kanë këmbëngulur në pafajësinë e tyre.
Tashmë beteja juridike e shkallës së parë ka mbërritur në fund dhe pritja është zhvendosur nga salla e gjyqit në rrugët e Kosovës.
Prishtina është mbushur me flamuj të UÇK-së, Kosovës dhe Shqipërisë, fotografi të katër ish-drejtuesve dhe pankarta me mesazhe në mbështetje të tyre. “Liria ka emër”, “Çlirimtarë, sillni në shtëpi” dhe “Heronj të luftës dhe paqes” janë disa prej mbishkrimeve të vendosura në kryeqytet dhe qytete të tjera. Në ndërtesën e Radio Kosovës është vendosur një mbishkrim i madh “Liria ka emër”, ndërsa në rrugë shihen automjete me flamuj të UÇK-së dhe portrete të Thaçit e Veselit. Në Prishtinë është përgatitur edhe hapësira ku qytetarët do të mund ta ndjekin së bashku aktgjykimin. Një ekran i madh është vendosur për transmetimin e drejtpërdrejtë të seancës nga Haga, ndërsa mbrëmjen e së martës qytetarët kishin nisur të mblidheshin aty. Para ekranit janë vendosur fotografitë e Thaçit, Veselit, Krasniqit dhe Selimit dhe është ndezur “Flaka e Lirisë”. Disa prej të pranishmëve kanë paralajmëruar se do ta kalojnë natën në shesh duke pritur verdiktin.
Mobilizimi kishte nisur që më 12 shtator, kur mijëra qytetarë morën pjesë në Prishtinë në “Marshin për Liri”, duke kërkuar pafajësinë dhe kthimin në Kosovë të ish-drejtuesve të UÇK-së. Associated Press raportoi gjithashtu për mijëra pjesëmarrës në tubimin në mbështetje të tyre.
Por pritja nuk është vetëm në Kosovë.
Qindra shqiptarë janë mbledhur edhe pranë Dhomave të Specializuara në Hagë, shumë prej tyre të ardhur nga Kosova dhe vende të ndryshme të Evropës. Ata kanë mbajtur flamuj të UÇK-së dhe kanë shprehur mbështetje për katër të akuzuarit, ndërsa në zonën pranë Gjykatës është raportuar edhe prani e shtuar policore. Qindra qytetarë në Hagë Vëmendja është përqendruar ndërkohë edhe te situata e sigurisë në Kosovë. KFOR-i ka ndërmarrë masa operative në prag të vendimit, ndërsa NATO ka ritheksuar angazhimin për sigurinë dhe stabilitetin. Pritja e një vendimi me peshë ka bërë që institucionet ndërkombëtare të ndjekin me kujdes zhvillimet.
Të mërkurën, megjithatë, vëmendja do të jetë vetëm te salla e gjyqit në Hagë.
Trupi gjykues do të duhet të përcaktojë nëse Prokuroria ka provuar përtej dyshimit të arsyeshëm përgjegjësinë penale të secilit prej katër të akuzuarve për secilën pikë të aktakuzës. Vendimi mund të sjellë shpallje fajësie ose pafajësie dhe nuk është e nevojshme që përfundimi të jetë i njëjtë për të katër apo për të gjitha akuzat.
Dhe bëhet fjalë vetëm për aktgjykimin e shkallës së parë. Palët do të kenë mundësinë të ndjekin procedurat e ankimit të parashikuara nga rregullat e Dhomave të Specializuara.
Mëngjesi i 16 shtatorit, megjithatë, do të jetë pika më e rëndësishme e një procesi që ka zgjatur prej vitesh. Në njërën anë qëndron Prokuroria, me dhjetë akuza dhe kërkesën për nga 45 vjet burg. Në anën tjetër janë Thaçi, Veseli, Krasniqi dhe Selimi, të cilët i kanë mohuar akuzat dhe kërkojnë pafajësinë.
Mes tyre do të flasin tre gjyqtarët.
Dhe ndërsa vendimi do të lexohet në Hagë, ai do të ndiqet njëkohësisht në një shesh të Prishtinës, në qytete të tjera të Kosovës dhe nga qindra shqiptarë që kanë udhëtuar drejt Holandës.
Pas më shumë se pesë vitesh në paraburgim, mbi tre vitesh gjykim, 134 dëshmitarësh dhe një dosjeje voluminoze provash, nesër Hashim Thaçi, Kadri Veseli, Jakup Krasniqi dhe Rexhep Selimi do të mësojnë vendimin e parë të drejtësisë për akuzat që i mbajnë në Hagë që prej vitit 2020. /Pamfletiuck kosova 811304210 1962582247750856 4484435153184362566 n screenshot 2026 09 15 173828 screenshot 2026 09 15 173837 screenshot 2026 09 15 173842 screenshot 2026 09 15 173850 1024x670 screenshot 2026 09 15 173911 screenshot 2026 09 15 173923 811901930 1751555036154556 2151012694179462312 n 811304210 1962582247750856 4484435153184362566 n Lini një Përgjigje Anuloje përgjigjen Kosova Ora e së vërtetës për Thaçin/ Çfarë do të vendosë Haga për njeriun që NATO e kishte partner? 15 Shtator 2026, 21:0821:08Kosova “O Hashim, ti ku je, krejt Kosovën këtu e ke”, shqiptarët "pushtojnë" sheshet në Hagë (Video) 15 Shtator 2026, 20:2220:22Kosova Kosova në prag të verdiktit të Hagës/ KFOR merr masa, avionë ushtarakë zbarkojnë në Prishtinë 15 Shtator 2026, 18:1018:10Kosova 45 vjet burg për Hashim Thaçin? Haga përballë një prej figurave që ndryshoi hartën politike të Ballkanit 15 Shtator 2026, 17:4917:49Kosova Ngërçi politik në Kosovë, LVV dhe LDK pezullojnë bisedimet për presidentin 15 Shtator 2026, 17:1117:11Kosova Nesër vendimi për ish-krerët e UÇK, edhe Britania thirrje për qytetarët e saj: Shmangni demonstratat! 15 Shtator 2026, 15:3415:34Kosova