Koreja e Veriut ka kryer një tjetër testim të armëve të saj strategjike, këtë herë duke provuar raketa lundruese të pajisura me koka luftarake me municione thërrmuese. Lajmi u raportua nga agjencia shtetërore e lajmeve KCNA, e cila pretendon se testimi demonstroi aftësinë e raketave për të goditur me saktësi objektivat. Testimi u zhvillua të hënën dhe, sipas KCNA-së, kishte si qëllim përmirësimin e aftësisë së raketave për të kryer sulme vertikale ndaj objektivave, si dhe rritjen e manovrueshmërisë gjatë fazës përfundimtare të fluturimit. Agjencia koreano-veriore pretendon se koka luftarake e montuar në raketën lundruese mund të shkatërrojë një sipërfaqe prej 5 deri në 6 hektarësh, duke e kthyer atë në hi me fuqinë maksimale të shpërthimit. Një zyrtar i Phenianit deklaroi se prova u krye në kuadër të përpjekjeve për të garantuar sigurinë kombëtare dhe për të penguar kërcënimet e mundshme ndaj vendit. Ndryshe nga raketat balistike, testimet e raketave lundruese nuk janë të ndaluara nga rezolutat e Këshillit të Sigurimit të OKB-së që kufizojnë programin raketor të Koresë së Veriut. Ndërkohë, Koreja e Jugut nuk raportoi zyrtarisht për lëshime raketash nga Pheniani gjatë së dielës dhe të hënës. Megjithatë, një zëdhënës i Shtabit të Përbashkët të ushtrisë koreano-jugore sqaroi se Seuli nuk publikon domosdoshmërisht çdo testim të kryer nga Koreja e Veriut, për shkak të konsideratave që lidhen me sigurinë dhe mbikëqyrjen ushtarake.
Testimi i fundit vjen pas një serie provash të tjera ushtarake të zhvilluara nga Pheniani gjatë javëve të fundit, përfshirë dronë nënujorë, raketa hipersonike dhe municione thërrmuese. © BalkanWeb Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb