Aktivisti Fatjon Rrapaj ka reaguar kundër instalimit të 31 kamerave inteligjente në gjimnazin “Qemal Stafa”, duke e cilësuar këtë si një cenim të dinjitetit dhe privatësisë së nxënësve. Sipas tij, shqetësimi kryesor lidhet me përdorimin e teknologjisë së monitorimit dhe mënyrën se si do të administrohen të dhënat e nxënësve.
Rrapaj ngre gjithashtu pikëpyetje mbi kompaninë e huaj që qëndron pas sistemit dhe pretendon se të dhënat e fëmijëve mund të ruhen jashtë Shqipërisë, duke ngritur shqetësime për sigurinë dhe përdorimin e të dhënave biometrike. Ai u bën thirrje nxënësve dhe prindërve të kërkojnë transparencë mbi mënyrën e mbledhjes, ruajtjes dhe përpunimit të këtyre të dhënave, si dhe mbi garancitë ligjore për mbrojtjen e tyre.
Sipas aktivistit, monitorimi nuk kufizohet vetëm te “Qemal Stafa”, por përfshin rreth 20 shkolla në vend. Duke kujtuar protestat e vitit 2014 kundër armëve kimike, ku ai thotë se mori pjesë si nxënës, Rrapaj shprehet se beson se edhe gjimnazistët e sotëm do të reagojnë për të mbrojtur të drejtat e tyre. “Mos u bëni kavie”, është thirrja e tij kundër monitorimit me kamera inteligjente.