Iliana Yotova ka fituar balotazhin presidencial në Bullgari, sipas rezultateve paraprake të publikuara pas numërimit të votave. Sipas përllogaritjeve të agjencive të sondazheve, ajo ka siguruar nga 57.4% deri në 58.2% të votave, kundrejt rivalit Andrey Gyurov, i cili ka marrë nga 38.6% deri në 39.6%. Nëse rezultatet konfirmohen zyrtarisht, Yotova do të bëhet gruaja e parë e zgjedhur presidente në historinë e Bullgarisë. Gyurov ka pranuar humbjen, duke deklaruar se vendimi i qytetarëve duhet respektuar.
Gara presidenciale u zhvillua mes Yotovës, e mbështetur nga kryeministri Rumen Radev dhe partia “Bullgaria Progresive”, dhe Andrey Gyurov, bankier dhe ish-kryeministër në detyrë, i mbështetur nga opozita pro-perëndimore. Një nga temat kryesore të fushatës ishte lufta në Ukrainë. Yotova ka mbrojtur zgjidhjen e konfliktit përmes negociatave me Rusinë, duke e cilësuar veten si një “Presidente të Paqes”, ndërsa Gyurov ka kërkuar forcimin e marrëdhënieve me partnerët perëndimorë dhe mbështetje më të madhe për Ukrainën. Zgjedhjet u zhvilluan gjithashtu në një klimë tensionesh në Detin e Zi, pas shtimit të sulmeve me dronë ndaj anijeve tregtare.
Edhe pse presidenca bullgare ka kryesisht karakter përfaqësues, kreu i shtetit ka kompetenca të rëndësishme, përfshirë drejtimin e forcave të armatosura, të drejtën e vetos ndaj ligjeve, nënshkrimin e marrëveshjeve ndërkombëtare dhe emërimin e ambasadorëve. Presidenti zgjidhet drejtpërdrejt nga qytetarët për një mandat pesëvjeçar, me mundësi për një mandat të dytë. Fitorja e Yotovës pritet të ndikojë në orientimin diplomatik të vendit, veçanërisht në raportet me Bashkimin Evropian, NATO-n dhe Rusinë.