Në një kohë kur protestat kundër qeverisë vijojnë prej më shumë se dy muajsh, Agjencia për Media dhe Informim pranë qeverisë ka hapur një thirrje për rekrutimin e profesionistëve të rinj të komunikimit publik. Njoftimi kërkon persona me ide dhe ekspertizë për mënyrën se si institucionet komunikojnë me qytetarët, përfshirë edhe përdorimin e platformave sociale dhe teknologjisë.
Thirrja vjen në një moment kur qeveria po përballet me kritika dhe protesta që lidhen me korrupsionin, mungesën e transparencës dhe mënyrën e administrimit të pronës publike. Sipas drejtoreshës së Agjencisë, Manjola Hasa, nisma nuk lidhet me një numër të caktuar vendesh vakante, por me një reformim të mënyrës së komunikimit institucional dhe përfshirjen e prurjeve të reja.
Agjencia për Media dhe Informim ka një organikë prej 69 punonjësish dhe është përgjegjëse për komunikimin publik të kryeministrit dhe ministrave. Nisma është kritikuar nga organizata ndërkombëtare të medias, të cilat e kanë cilësuar agjencinë si një strukturë që rrit kontrollin e qeverisë mbi informacionin, ndërsa hapja e thirrjes së re vjen në kulmin e përplasjeve mes qeverisë dhe protestuesve.