Një konflikt mes tre personave në Shkodër ka përfunduar me përdorimin e armës së zjarrit dhe thikës, duke shkaktuar një viktimë dhe dy të plagosur. Ngjarja ndodhi rreth orës 05:30 në lagjen “Kongresi i Përmetit”, ku 25-vjeçari Andri Vulaj dyshohet se ka qëlluar me armë zjarri ndaj 63-vjeçarit Qamil Luli dhe djalit të tij, 24-vjeçarit Ylber Luli.
Babë e bir dyshohet se janë kundërpërgjigjur duke plagosur me thikë 25-vjeçarin Vulaj. Të tre të përfshirët u dërguan për ndihmë mjekësore, por 24-vjeçari Ylber Luli nuk ka mundur t’u mbijetojë plagëve të marra dhe ka ndërruar jetë në spital, ndërsa babai i tij ka mbetur i plagosur.
Pas ngjarjes, shërbimet e Policisë kanë kapur dhe shoqëruar autorin e dyshuar, Andri Vulaj, ndërsa kanë sekuestruar edhe pistoletën që dyshohet se është përdorur në konflikt. Grupi hetimor vijon punën për zbardhjen e plotë të rrethanave, përcaktimin e përgjegjësive dhe dokumentimin ligjor të ngjarjes.