Hulumtimet e reja sugjerojnë se një qasje e respektueshme dhe formale është mënyra më efektive për të siguruar një përgjigje të shpejtë kur i drejtoheni një mjeku për trajtim. Sipas studiuesve në Universitetin Columbia, mënyra se si një pacient shkruan një mesazh online ka të ngjarë të ndikojë nëse një mjek përgjigjet dhe sa shpejt përgjigjet.Lexo edhe:Gripi i shpendëve po përhapet, ekspertët paralajmërojnë: Mos i ushqeni zogjtë në oborr Mesazhet që fillojnë me “Dear Dr.” (“I nderuar doktor.”) kanë më shumë gjasa të marrin një përgjigje të shpejtë, një gjetje që sugjeron se nevoja mjekësore ose urgjenca nuk është gjithmonë konsiderata e parë në përcaktimin se sa shpejt një pacient merr përgjigje. “Stili i të shkruarit duke përfshirë faktorë të tillë si gjatësia, formaliteti, toni emocional dhe mënyra se si fillonte një mesazh shpjegonte pothuajse gjysmën e këtyre dallimeve”, tha ekipi në një punim të botuar nga revista e Shoqatës Mjekësore Amerikane, JAMA Network Open. Studimi, i kryer në Shkollën e Shëndetit Publik Mailman të Universitetit Columbia, u bazua në të dhënat e rreth gjysmë milioni pacientëve që kërkuan trajtim përmes portaleve online, ku një kërkesë i dërgohet një mjeku. Por, në shumicën e rasteve, përpjekjet për të kontaktuar mjekun kalonin fillimisht nëpër një proces klasifikimi, ku një infermier ose një punonjës tjetër i kujdesit shëndetësor i shqyrtonte ato përpara se t’i shikonte një mjek. “Në shumë sisteme të klasifikimit të mesazheve, infermierët dhe asistentët mjekësorë duhet t’i vlerësojnë shpejt mesazhet dhe të gjykojnë për urgjencën, kompleksitetin dhe nevojën për përshkallëzim të tyre”, tha Mitchell Tang, profesor në Universitetin Columbia. “Duke pasur parasysh këto kufizime, stili i të shkruarit mund të ndikojë në mënyrë të kuptueshme në mënyrën se si mesazhet perceptohen dhe prioritizohen”, tha Tang, duke shtuar se gjetjet tregojnë për paragjykime të mundshme në mënyrën se si përcaktohet shpejtësia me të cilën marrin përgjigje kërkesat. U konstatua se pacientët me ngjyrë kishin një shkallë përgjigjeje 3,7 pikë përqindjeje më të ulët nga “klinicienti i synuar”, krahasuar me pacientët e bardhë. Ai vuri në dukje se përdorimi i një përshëndetjeje si “dear” (“i nderuar/e nderuar”) kishte prirjen të sillte një përgjigje më të shpejtë dhe tha se gjetjet janë një kujtesë se “stili i komunikimit mund të ndikojë në mënyrën se si i perceptojmë dhe si u përgjigjemi njerëzve jo vetëm në kujdesin shëndetësor, por edhe në jetën tonë të përditshme.”/DPA News
