Një 43-vjeçar i shpallur në kërkim ndërkombëtar nga drejtësia spanjolle është arrestuar mesditën e 18 gushtit në Gjirokastër. Klodian Bena u kap në kuadër të operacionit policor “Fugitive”, pas informacioneve operative për vendndodhjen e tij. Gjykata e Sabadellit në Spanjë, në qershor 2025, kishte caktuar ndaj tij masën e sigurisë “Arrest në burg”, ndërsa ai akuzohet për kultivim dhe trafikim të lëndëve narkotike, si dhe vjedhje të energjisë elektrike. Interpol Tirana ka nisur bashkëpunimin me homologët në Madrid për procedurat e ekstradimit.
Sipas të dhënave të bëra publike nga autoritetet spanjolle dhe të raportuara nga “El M”, Bena dyshohet se lidhet me aktivitetin e kultivimit intensiv të kanabisit në ambiente të mbyllura, të njohura si “shtëpi bari”. Këto plantacione kërkojnë konsum të lartë energjie për ndriçim, ventilim dhe sisteme të tjera teknike, ndërsa grupet kriminale dyshohet se përdorin lidhje të paligjshme me rrjetin elektrik për të shmangur kostot dhe për të fshehur aktivitetin. Hetimi i Gjykatës së Sabadellit e lidh 43-vjeçarin me akuzat për narkotikë dhe mashtrim me energjinë elektrike.
Arrestimi i Klodian Benës vjen në një kohë kur autoritetet spanjolle dhe Europol kanë evidentuar rritjen e aktivitetit të grupeve kriminale me origjinë shqiptare në tregun e kanabisit në Spanjë. Sipas raportimeve, këto grupe janë përfshirë si në kultivimin e kanabisit në magazina industriale dhe vila të përshtatura për prodhim, ashtu edhe në importin dhe rishpërndarjen e drogës në vende të tjera të BE-së. Një nga operacionet më të mëdha kundër një rrjeti të tillë u zhvillua në korrik 2021, kur u arrestuan 107 persona dhe u zbulua se dëmi nga vjedhja e energjisë elektrike për plantacionet e kanabisit kishte kaluar 1.6 milionë euro.