Presidenti Donald Trump ka dhënë sinjale se administrata e tij do të zhvendoset edhe më tej drejt një linje të ashpër politike, pasi e cilësoi rezultatin e zgjedhjeve të fundit në SHBA si një “hap të madh prapa” për vendin. Këshilltari i tij i njohur për qëndrimet e ashpra, Stephen Miller, pritet të marrë detyrën e shefit të stafit të Shtëpisë së Bardhë të hënën. Ndërkohë, Trump ka zhvilluar bisedime edhe me Dana White, presidentin dhe drejtorin ekzekutiv të organizatës së arteve marciale të përziera, Ultimate Fighting Championship (UFC), të cilit i ka ofruar postin e zëdhënësit të Shtëpisë së Bardhë. LEXO edhe...Lufta/ Trump: Sulmet e reja ndaj Iranit janë ‘shumë pak të mundshme’ nëse negociatat shënojnë përparim “Amerika bëri një hap të madh prapa në histori me rezultatet e zgjedhjeve të fundit”, shkroi Trump të dielën në mëngjes në platformën e tij Truth Social, duke iu referuar edhe rënies së ndjeshme të tregjeve globale, e cila u shoqërua me një valë shitjesh të aksioneve të kompanive amerikane të teknologjisë. “Por mos kini frikë, ne do të rikthehemi më të mëdhenj dhe më të fortë se kurrë më parë!”, shtoi presidenti amerikan, shkruajnë mediat e huaja. Pavarësisht humbjes së kontrollit të të dyja dhomave të Kongresit amerikan nga republikanët në zgjedhjet vendimtare të mesmandatit të së martës, si dhe pakënaqësisë së shprehur nga votuesit ndaj disa prej politikave kryesore të administratës Trump, përfshirë luftën me Iranin dhe tarifat e gjera tregtare, administrata duket e vendosur të vijojë kursin e saj politik. Emërimi i Millerit në një post të rëndësishëm ka shtuar pritshmëritë se Trump do të ashpërsojë më tej politikën kundër emigracionit, do të intensifikojë përplasjet kulturore dhe do të refuzojë lëshimet ndaj shumicës së re demokrate në Kongres. “Ky emërim sinjalizon se administrata do të ndjekë një strategji përballjeje, duke qëndruar e pozicionuar në mbrojtje gjatë dy viteve të fundit të mandatit”, deklaroi për Reuters Dan Eberhart, një prej donatorëve të Trumpit dhe drejtues në sektorin e energjisë. Trump i ofron Dana White postin e zëdhënësit të Shtëpisë së Bardhë Të shtunën, Trump njoftoi papritur se i kishte ofruar Dana White postin e zëdhënësit të Shtëpisë së Bardhë, duke e cilësuar atë si “një luftëtar të dhunshëm dhe një kampion të vërtetë”. Ky pozicion ka mbetur kryesisht vakant që prej largimit të Karoline Leavitt nga administrata gjatë verës. Edhe zëvendësuesja e saj fillestare, Katie Zacharia, qëndroi vetëm pesë ditë në këtë detyrë. “Dana do të jetë një zëdhënës si askush tjetër. Dana, të lutem pranoje këtë detyrë!”, deklaroi Trump. Trump kërcënon demokratët me hetime, ndërsa republikanët paralajmërojnë përballje Përveç ndryshimeve në administratë, Trump ka kërcënuar edhe demokratët që planifikojnë të ushtrojnë kontroll parlamentar mbi veprimtarinë e administratës së tij dhe të familjarëve të tij. Presidenti njoftoi se kishte urdhëruar Departamentin e Drejtësisë së SHBA-së të shqyrtonte veprimtarinë e tyre. I pyetur për këtë çështje në emisionin “State of the Union” të CNN-it të dielën, prokurori i përgjithshëm Todd Blanche deklaroi se mund të ketë hetime. Blanche pretendoi se republikanët janë përballur me kërcënime “të rrezikshme”, pa specifikuar se për cilat vepra penale bëhej fjalë. “Duhet të vendoset një kufi”, u shpreh ai. Demokratët kanë bërë të ditur se Stephen Miller dhe Elon Musk, njeriu më i pasur në botë dhe një aleat i afërt i Trumpit, pritet të jenë ndër objektivat kryesorë të hetimeve parlamentare pasi partia të marrë kontrollin e Kongresit në janar. Kongresmeni demokrat nga Kalifornia, Robert Garcia, i cili pritet të drejtojë Komitetin e fuqishëm të Mbikëqyrjes në Dhomën e Përfaqësuesve vitin e ardhshëm, deklaroi të dielën se hetimet do të përqendrohen te përfshirja e Musk në largimin masiv të punonjësve federalë vitin e kaluar, përmes Departamentit për Efikasitetin e Qeverisë, si dhe te roli i Millerit në politikën e ashpër kundër emigracionit. “Mendoj se ka një interes të madh, jo vetëm nga komiteti ynë, por edhe nga komisionet e tjera të Kongresit, për të dëgjuar zotin Musk”, deklaroi Garcia për CNN. Ndërkohë, kongresmeni demokrat Jamie Raskin, i cili pritet të marrë drejtimin e Komitetit të Drejtësisë në Dhomën e Përfaqësuesve, ka kërkuar gjithashtu informacion mbi aktivitetet e biznesit të dhëndrit të Trumpit, Jared Kushner, dhe të djalit të tij, Donald Trump Jr. Demokratët kryesojnë në garën për Senatin Nga 35 garat për vendet në Senatin amerikan, rezultatet e 33 prej tyre janë shpallur, me demokratët që kanë siguruar 54 vende, kundrejt 44 të republikanëve. Numërimi i votave vijon në Alaskë, e cila prej kohësh konsiderohej një nga shtetet kyçe në garën elektorale, si dhe në Misisipi, një bastion tradicional republikan, ku rezultati mbetet ende i ngushtë. Kongresmeni republikan nga Kentaki, James Comer, i cili aktualisht drejton Komitetin e Mbikëqyrjes në Dhomën e Përfaqësuesve, deklaroi për Fox News se komiteti do t'i kushtojë dy muajt e fundit të këtij sesioni hetimit të çështjes së zgjedhjeve për Senatin në Alaskë. Trump ka kërcënuar më herët kandidaten demokrate Mary Peltola me ndjekje penale, pas raportimeve se fushata e saj ishte përfshirë në rekrutimin e një kandidati të dytë me emrin Dan Sullivan, të njëjtë me atë të kandidatit republikan në garën për Senatin në Alaskë. Demokratët festojnë fitoren dhe premtojnë ndryshime për shtresën punëtore Ndërkohë, demokratët kanë vijuar festimet për rezultatet historike të zgjedhjeve të së martës. Kandidati demokrat që fitoi garën për kryetar të bashkisë së Nju-Jorkut, Zohran Mamdani, deklaroi për Fox News të dielën se kandidatët e partisë së tij arritën fitoret duke u mbështetur në politika që synojnë të përmirësojnë jetën e qytetarëve dhe veçanërisht të shtresave punëtore. “Po përjetojmë një moment historik, në të cilin amerikanët e klasës punëtore e kanë bërë shumë të qartë se janë lodhur duke pritur”, deklaroi Mamdani. “Ata janë lodhur duke dëgjuar vazhdimisht se kanë gjithnjë e më pak mundësi për të përballuar jetesën, ndërkohë që shohim shfaqjen e njeriut të parë në botë me një pasuri prej një trilion dollarësh, Elon Musk”, shtoi ai. Megjithatë, brenda Partisë Demokratike kanë nisur të shfaqen edhe mosmarrëveshje lidhur me drejtimin e ardhshëm të Kongresit. Chuck Schumer pritet të marrë drejtimin e shumicës në Senatin amerikan, ndërsa Hakeem Jeffries shihet si kandidati kryesor për postin e kryetarit të Dhomës së Përfaqësuesve. Senatori i sapozgjedhur nga Kansasi, Adam Hamilton, demokrati i parë që ky shtet dërgon në Senatin amerikan prej gati një shekulli, deklaroi të dielën për emisionin “Meet the Press” të NBC-së se Schumer është një figurë që shkakton përçarje. “Mendoj se kjo është një periudhë që kërkon ide të reja dhe një person që të na bashkojë, në vend që të na ndajë”, u shpreh Hamilton. Fitorja e demokratëve bëhet pjesë edhe e humorit televiziv Festimet e demokratëve vijuan edhe gjatë emisionit humoristik “Saturday Night Live”. Gjatë një skeçi të transmetuar të shtunën në mbrëmje, një prej aktorëve imitoi Donald Trumpin, duke sulmuar me ironi James Talaricon, kandidatin demokrat për Senatin në Teksas, të cilin e quajti me nofkën “Talafreako”. Por në skenë u shfaq papritur vetë Talarico, duke shkaktuar brohoritje të forta nga publiku. “Këtu është senatori Talafreako!”, u shpreh ai me humor. Talarico u bë demokrati i parë që fiton një post shtetëror në Teksas që prej vitit 1994. R.Xh/ReportTv.al donald trump SHBA zgjedhjet ne shba Republikanët demokratet kongresi amerikan Senati amerikan Komento Komente Sondazhi i ditës: Cilin mbështesni në përplasjen politike që u hap? Ramën 48.2% Veliajn 17.8% Asnjërin 34% Vota total: 2043 Sondazhi i ditës: Cilin mbështesni në përplasjen politike që u hap?
