Një nga sulmet më të mëdha në historinë e kriptomonedhave dyshohet se ka goditur bursën Binance, ku sipas raportimeve janë vjedhur rreth 6.3 miliardë dollarë. Sulmi, i zbuluar më 3 nëntor dhe i ndodhur më 29 tetor, dyshohet se ishte përgatitur prej muajsh nga hakerë të organizuar. Sipas informacioneve, gjithçka nisi përmes një oferte pune të rreme, e cila u përdor për të depërtuar në sistemet e kompanisë.
Në shtator, një inxhinier i Binance u kontaktua përmes një platforme të ligjshme punësimi nga persona që paraqiteshin si drejtues të një kompanie. Pas disa intervistave, atij iu kërkua të kryente një detyrë programimi, e cila në fakt përmbante një program keqdashës. Përmes këtij mekanizmi, sulmuesit arritën të siguronin akses në sistemet e brendshme, ndërsa më pas shfrytëzuan edhe një mjet të inteligjencës artificiale për të depërtuar në sistemet e kolegëve të tij.
FBI ia ka atribuar sulmin një grupi hakerash të lidhur me Korenë e Veriut, ndërsa Pheniani ka mohuar çdo përfshirje. Ngjarja ka ngritur shqetësime të mëdha për sigurinë kibernetike të platformave financiare, duke treguar se edhe një proces rutinë punësimi mund të shndërrohet në pikën e dobët të një kompanie që administron miliarda dollarë në asete dixhitale.