Një pjesë e konsiderueshme e qytetarëve shqiptarë përballen me vështirësi financiare për të përballuar shpenzimet deri në fund të muajit. Të dhënat e publikuara së fundmi tregojnë se rreth 55% e shqiptarëve e konsiderojnë të vështirë ose shumë të vështirë situatën e tyre financiare mujore.
Shifra e Shqipërisë është dukshëm më e lartë se mesatarja e Bashkimit Europian, ku rreth 17% e qytetarëve deklarojnë vështirësi të ngjashme. Të dhënat evidentojnë kështu presionin që shpenzimet e përditshme, në raport me të ardhurat, vijojnë të krijojnë për familjet shqiptare.
Ky tregues lidhet me atë që Eurostat e përkufizon si “varfëri subjektive”, e cila mat perceptimin e individëve për aftësinë e tyre për të përballuar shpenzimet e jetesës. Krahas treguesve tradicionalë të varfërisë, kjo matje pasqyron edhe mënyrën se si familjet e vlerësojnë realisht gjendjen e tyre ekonomike dhe mundësinë për të përballuar muajin me të ardhurat që kanë.