Një qytetar i është drejtuar redaksisë së JOQ Albania për të denoncuar gjendjen në rrugën që lidh fshatin Podgorie me Kishnikun, në zonën e administruar nga Bashkia Maliq.
Sipas denoncuesit, prej rreth 4 ditësh në rrugë janë hedhur grumbuj dheu, gurësh dhe balte, duke vështirësuar kalimin e automjeteve, veçanërisht mjeteve të mëdha.
Në pamjet e dërguara në redaksi shihet rruga rurale e bllokuar pjesërisht nga grumbujt e dheut dhe gurëve, ndërsa në disa pjesë janë krijuar edhe gropa dhe pellgje me ujë.
Qytetari ngre shqetësimin edhe për gjendjen e zonës së banuar. Sipas tij, koshat e mbeturinave mund të qëndrojnë deri në 10 ditë pa u pastruar, ndërsa mbetjet janë shpërndarë edhe përreth tyre.
Në një tjetër pjesë të pamjeve shihet një shtyllë elektrike me kabinë/transformator, për të cilën denoncuesi pretendon se nuk ka masa të mjaftueshme sigurie.
“Mirë që ka hedhur gjithë këtë investim, po i hodhën dhe i lanë pa hapur këta të Gëzim Topçiut. Ju lutem publikoheni. Ndodhet në rrugën që lidh fshatin Podgorie me Kishnikun. Kanë 4 ditë që kanë hedhur dherin dhe është bërë problem për kaluesit me makina të mëdha. Kabina e korrenti pa asnjë lloj sigurie, koshat e plehrave nga 10 ditë pa i marrë makina.”
Denoncuesi sjell në vëmendje edhe premtimet për zhvillimin e zonës, duke ngritur pyetjen se si përputhen ato me gjendjen aktuale në terren.
“Edhe vjen kryetari, thotë: ‘Fshatin Podgorie do ta bëjmë qytezë’. Ja gjendja?”
Pretendimet për mungesën e mirëmbajtjes së rrugës, pastrimit të mbetjeve dhe masave të sigurisë pranë instalimeve elektrike kërkojnë verifikim nga institucionet përgjegjëse.
JOQ Albania publikon pamjet dhe denoncimin e qytetarit, ndërsa mbetet në pritje të një reagimi nga Bashkia Maliq dhe strukturat përgjegjëse për rrugën, pastrimin dhe sigurinë e instalimeve elektrike. View this post on Instagram A post shared by JOQ News (@joqnews)