Himara është kthyer në një ferr të vërtetë në tokë.
Pamjet dramatike të siguruara me dron tregojnë përmasat katastrofike të zjarrit që ka përfshirë zonën, duke lënë pas një panoramë apokaliptike. Nga ajri, flakët dhe tymi i dendur shfaqen duke pushtuar kodrat pranë qytetit, ndërsa një sipërfaqe e tërë duket sikur është gëlltitur nga zjarri.
Zjarri shpërtheu pranë lagjes “1 Maji” dhe bypass-it të Himarës, duke u përhapur me shpejtësi drejt zonave të banuara. Era e fortë dhe terreni i vështirë e kthyen situatën në një betejë të vërtetë për jetën dhe pronën.
Flakët iu afruan banesave, duke detyruar autoritetet të ndërmarrin evakuime. Raportohet se disa banesa janë përfshirë nga zjarri, ndërsa dy të moshuar u shpëtuan në kohë nga flakët që kishin rrethuar zonën.
Por pamjet nga ajri tregojnë më shumë se çdo deklaratë zyrtare.
Ato dëshmojnë për një Himarë të mbuluar nga tymi, me sipërfaqe të tëra të përfshira nga zjarri dhe me një panoramë që të kujton skena filmash apokaliptikë. Aty ku pak orë më parë kishte gjelbërim, tani ka tokë të zezë, hi dhe tym.
Një nga perlat e bregdetit shqiptar u përball me një nga netët më të frikshme, ndërsa banorët dhe pushuesit panë flakët të zbresin gjithnjë e më pranë shtëpive dhe bizneseve të tyre.
Nga pamjet me dron, Himara duket si një ferr në tokë. Një qytet që për orë të tëra luftoi për të mos u përpirë nga flakët.