Tirana është kthyer në qendër të një takimi ndërkombëtar të drejtuesve dhe ekspertëve të sigurisë nga SHBA-ja dhe Europa. Nga 19 deri më 23 shtator, në kryeqytet zhvillohet takimi i 42-të i kapitullit europian të FBI National Academy Associates (FBINAA), ku në fokus janë lufta kundër krimit të organizuar dhe forcimi i bashkëpunimit mes institucioneve ligjzbatuese. Në axhendën e takimit janë përfshirë një sërë çështjesh që lidhen me sigurinë, përfshirë terrorizmin, ekstremizmin online, krimin kibernetik, narkotikët, përdorimin e dronëve, pastrimin e parave dhe sekuestrimin e pasurive kriminale. Pjesë e diskutimeve janë edhe ekstradimet dhe hetimet ndërkombëtare, ndërsa një vëmendje e veçantë i kushtohet grupimit online “764”, të lidhur nga autoritetet amerikane me ekstremizmin e dhunshëm dhe aktivitetet kriminale në internet. Në aktivitet marrin pjesë përfaqësues të Policisë së Shtetit, SPAK-ut, Byrosë Kombëtare të Hetimit dhe Prokurorisë. Nga pala amerikane është parashikuar pjesëmarrja e Spencer Horn, zyrtar i lartë i FBI-së, si dhe e atasheut të FBI-së në Sofje, Brendan Collins. Gjatë takimeve do të shkëmbehen përvoja për hetimet financiare, goditjen e rrjeteve kriminale dhe bashkëpunimin ndërkombëtar, ndërsa BKH-ja pritet të prezantojë edhe një rast konkret hetimor në fushën e narkotikëve.
