“Tak Fak” në News24 vijon të ndjekë hap pas hapi problematikën e rrugës Fier-Seman, pas denoncimit të Nexhat Kullës, i cili prej kohësh kërkon ndërhyrje për përmirësimin e këtij aksi rrugor. Nexhat Kulla thotë se i është drejtuar disa institucioneve, përfshirë Bashkinë Fier, strukturat e qarkullimit rrugor dhe Kryeministrinë, por sipas tij, shqetësimi i ngritur prej tij ende nuk ka marrë zgjidhje. Ai deklaron se ka depozituar katër kërkesa me shkrim për rregullimin e aksit Fier–Seman, por pretendon se nuk ka marrë asnjë përgjigje. Për të verifikuar pretendimet, grupi i “Tak Fak” shkoi në Bashkinë e Fierit, ku u bë edhe ballafaqimi i Nexhat Kullës me punonjësit e institucionit. Punonjësit e bashkisë pretenduan se qytetari kishte marrë përgjigje për kërkesat e tij. Por Kulla i kundërshtoi, duke deklaruar se nuk kishte marrë asnjë përgjigje zyrtare për katër kërkesat që kishte depozituar.
Në vijim, punonjësit e bashkisë kërkuan që të bëhej një kërkesë me shkrim për marrjen e një përgjigjeje, ndërsa Kulla këmbënguli se këtë procedurë e kishte ndjekur më herët dhe se kishte dorëzuar katër kërkesa. Për problematikën e sinjalistikës, “Tak Fak” iu drejtua ekspertit rrugor Gëzim Hoxha.
Hoxha shpjegon se tabela “STOP” duhet të vendoset përpara kryqëzimit dhe në lartësinë e përcaktuar, ndërsa vendosja e saj në mënyrë të improvizuar në një shtyllë tensioni, sipas tij, përbën një situatë të rrezikshme. Eksperti thekson se ndërhyrjet për përmirësimin e sinjalistikës duhet të kryhen përpara se të regjistrohen viktima të tjera.
Sipas Hoxhës, me një ndërhyrje që mund të realizohet brenda pak orësh, ky segment mund të plotësohet me sinjalistikën e nevojshme dhe të përmirësohet situata aktuale.
“Tak Fak” kërkoi gjithashtu një reagim nga kryetari i Bashkisë Fier, Armando Subashi.
Subashi deklaroi se aksi Fier–Seman nuk është në inventarin dhe kompetencën e Bashkisë Fier, por të Autoritetit Rrugor Shqiptar (ARRSH). Sipas tij, në përgjegjësinë e ARRSH-së janë mirëmbajtja, pastrimi, investimet dhe ndërhyrjet në këtë aks.
Kryebashkiaku tha se gjendja aktuale mund të lidhet edhe me një projekt të parashikuar për rikonstruksionin dhe zgjerimin e rrugës.
Megjithatë, Subashi theksoi se, sipas tij, aksi nuk mund të konsiderohet pa sinjalistikë, ndërsa shtoi se mund të jetë e nevojshme vendosja e elementeve shtesë të sinjalistikës.
Ndërkohë, sipas informacionit të përcjellë nga ARRSH, prej rreth një viti i është lënë detyrë Drejtorisë Rajonale Jug në Gjirokastër që të ndërhyjë për vendosjen e sinjalistikës në këtë aks.
Përplasja mes pretendimeve të qytetarit, Bashkisë Fier dhe strukturave përgjegjëse ngre pikëpyetje mbi zbatimin e detyrimeve për mirëmbajtjen dhe sinjalistikën e rrugës Fier–Seman, ndërsa banorët kërkojnë që ndërhyrjet të mos mbeten vetëm në nivelin e ankesave dhe deklaratave. © BalkanWeb Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb Etiketa: fier Nexhat Kulla policia Seman