Bota ka hyrë në një “zonë rreziku të motit ekstrem”, pasi ndikimet e fenomenit El Niño kanë nisur të ndihen në mbarë botën. Kreu i OKB-së, António Guterres, paralajmëroi se planeti po hyn në “ujëra të paeksploruara”, ndërsa Organizata Botërore Meteorologjike (WMO) vlerëson se El Niño mund të jetë ndër më të fuqishmit në më shumë se 70 vjet dhe të zgjasë të paktën deri në shkurt 2027.
Fenomeni natyror, i cili zhvillohet në Oqeanin Paqësor, po ndryshon modelet e motit global, duke shkaktuar thatësira në disa rajone dhe reshje të dendura, përmbytje e stuhi më të fuqishme në të tjera. Temperaturat e sipërfaqes së detit në Paqësorin tropikal janë më shumë se 2 gradë Celsius mbi mesataren, ndërsa parashikimet sugjerojnë se në muajt në vijim mund të afrohen me 4 gradë mbi normalen. Në disa zona nën sipërfaqen e oqeanit janë regjistruar temperatura deri në 8 gradë Celsius mbi mesataren.
WMO ka nisur një mobilizim ndërkombëtar për të shpërndarë parashikime dhe paralajmërime mbi ngjarjet ekstreme të motit që mund të lidhen me El Niño. Sekretarja e Përgjithshme e WMO-së, Celeste Saulo, paralajmëroi se fenomeni mund të shkaktojë pasoja të rënda për komunitetet dhe ekonomitë në mbarë botën, duke rritur rrezikun për viktima, zhvendosje të popullsisë dhe dëme mjedisore.