Një ngjarje e rëndë ka tronditur qytetin e Grazit në Austri, ku një 24-vjeçare shqiptare është vrarë brenda banesës ku jetonte me partnerin e saj.
Burime për JOQ Albania bëjnë me dije se viktima është Abigel Laçi, me origjinë nga Fieri. Sipas informacionit të mbërritur në redaksi, e reja dyshohet se është goditur për vdekje me çekiç.
Ngjarja ndodhi mesditën e së enjtes, 3 shtator, në një apartament në qendër të Grazit. Policia u njoftua rreth orës 12:40 dhe, pasi mbërriti në vendngjarje, gjeti 24-vjeçaren të pajetë. Sipas autoriteteve, ajo ndërroi jetë në vend për shkak të plagëve të marra.
Pak pas ngjarjes, në shkallët e pallatit u arrestua një 23-vjeçar, i cili, sipas dëshmitarëve, ishte i mbuluar me gjak. Fillimisht policia bëri të ditur se i riu kishte lidhje familjare me viktimën, ndërsa më vonë u konfirmua se ai është vëllai i partnerit të Abigel Laçit.
Sipas hetimeve paraprake, 23-vjeçari dyshohet se ka shkuar i vetëm në banesë dhe ka hyrë me forcë. Në atë moment, Abigel ndodhej e vetme, pasi partneri i saj nuk ishte në apartament. Çekiçi dyshohet të jetë përdorur si mjet në krim, ndërsa autoritetet nuk kanë bërë publike të gjitha detajet për të mos cenuar hetimin.
I riu ka zgjedhur të mos flasë gjatë marrjes në pyetje dhe nuk ka dhënë asnjë informacion mbi ngjarjen apo motivin e mundshëm. Ai po hetohet për dyshimin e vrasjes dhe është dërguar në institucionin penitenciar Graz-Jakomini me urdhër të Prokurorisë së Grazit.
Ndërkohë, trupi i 24-vjeçares i është nënshtruar autopsisë, ndërsa hetuesit e Landeskriminalamt Steiermark po vijojnë punën për zbardhjen e plotë të ngjarjes. Deri tani, nuk ka një motiv zyrtar të konfirmuar.
Në redaksinë e JOQ Albania ka mbërritur edhe një denoncim nga një person që pretendon se e njeh rastin. Sipas tij, vrasja lidhet me motive raciste, pasi Abigel ishte shqiptare. Denoncuesi ngre shqetësimin se prejardhja e viktimës nuk është bërë e ditur në mediat austriake dhe kërkon vëmendjen e institucioneve shqiptare, përfshirë Ambasadën e Shqipërisë në Austri.
Këto pretendime nuk janë konfirmuar deri tani nga autoritetet austriake dhe mbeten pjesë e informacionit të përcjellë nga denoncuesi.